“Yangi Konstitutsiyada qonun chiqaruvchi, ijro hokimiyati, sud hokimiyati o‘rtasidagi vakolatlar qayta taqsimlandi” — Aktam Hayitov

O‘zbekiston Liberal demokratik partiyasi raisi Aktam Hayitov referendum yakunlari, yangilangan Konstitutsiya yuzasidan fikrlarini bildirib o‘tdi. 

Hayitov Konstitutsiyaviy islohotlar bir yil avval O‘zLiDeP hamda “Milliy tiklanish” partiyalari tashabbuslar bilan boshlanganini, bugunga kelib esa yangi Konstitutsiya xalqimiz tomonidan to‘liq qo‘llab-quvvatlanganini taʼkidladi. 

“Prezidentimizning takliflari bilan, umumxalq referendumi o‘tkazildi va xalqimizning ishonchi bilan, qabul qilinayotgan islohotlar xalqchil ekanligi, xalqimiz hayotini yaxshilash uchun hissa qo‘shadigan muhim normalar bo‘lganligi tufayli xalqimiz Konstitutsiyamizni qabul qildi. Bugun uning ijrosi bo‘yicha Qonunchilik palatasida jiddiy ishlarni amalga oshiryapmiz. 

Ayniqsa, partiyamiz vakillari bo‘lgan tadbirkorlar, ishbilarmonlar, fermer, dehqonlar, klasterlar, ziyolilarimiz, yoshlarimiz bu Konstitutsiyadagi yangilangan normalarni amalga oshirishda o‘zlariga manfaat sezishyapti. Birinchidan, mulk dahlsizligining taʼminlanishi, tadbirkorlik faoliyatining erkinligi kuchayayotgani, emin-erkin faoliyat yuritayotganligi misoldir”, — deydi O‘zLiDeP raisi. 

Aktam Hayitov muddatidan oldin saylov o‘tkazish tashabbusini davlat rahbari ilgari surganini aytib o‘tdi. 

“Buni juda ham to‘g‘ri qaror deb hisoblaymiz. Chunki, iqtisodiyotimizning rivojlanishi, bardavom bo‘lishi barqaror yo‘nalishda ishlarni tashkil qilishga bog‘liq. Chunki, xalqimiz Konstitutsiya bilan amalga oshirilayotgan islohotlarga ishonchini bildirdi. 

Konstitutsiyada uchta hokimiyat tarmog‘i o‘rtasidagi, bu qonun chiqaruvchi, ijro hokimiyati, sud hokimiyati o‘rtasidagi vakolatlar qayta taqsimlandi. Shu bilan birga, Senat va qonunchilik palatasi o‘rtasidagi vakolatlar ham qayta taqsimlanishi bilan birga, xalqimizning juda katta inson huquqlari bilan, inson qadri bilan bog‘liq normalar o‘zgardi. Ular uch baravarga oshdi. 

1,3 mln dan ortiq aʼzosi bo‘lgan O‘zLiDeP bu tashabbusni qo‘llab-quvvatlashi va prezidentlik saylovida o‘ziga tegishli zarur choralarni ko‘rishini majlis jarayonida ham bildirdik va endilikda biz o‘zimizning ichki jarayonlarimizni amalga oshirishni boshlaymiz. Eng muhimi yangilangan Konstitutsiyamizni xalqimizga xizmat qilish uchun, mana shu Konstitutsiyamizdan kelib chiqib yangi qonunlarni qabul qilinishi va ijro qilinishi uchun faol choralarni ko‘ramiz”, — deydi O‘zbekiston Liberal demokratik partiyasi raisi Aktam Hayitov.