“Янги Конституцияда қонун чиқарувчи, ижро ҳокимияти, суд ҳокимияти ўртасидаги ваколатлар қайта тақсимланди” — Актам Ҳайитов 

Ўзбекистон Либерал демократик партияси раиси Актам Ҳайитов референдум якунлари, янгиланган Конституция юзасидан фикрларини билдириб ўтди. 

Ҳайитов Конституциявий ислоҳотлар бир йил аввал ЎзЛиДеП ҳамда “Миллий тикланиш” партиялари ташаббуслар билан бошланганини, бугунга келиб эса янги Конституция халқимиз томонидан тўлиқ қўллаб-қувватланганини таъкидлади. 

“Президентимизнинг таклифлари билан, умумхалқ референдуми ўтказилди ва халқимизнинг ишончи билан, қабул қилинаётган ислоҳотлар халқчил эканлиги, халқимиз ҳаётини яхшилаш учун ҳисса қўшадиган муҳим нормалар бўлганлиги туфайли халқимиз Конституциямизни қабул қилди. Бугун унинг ижроси бўйича Қонунчилик палатасида жиддий ишларни амалга оширяпмиз. 

Айниқса, партиямиз вакиллари бўлган тадбиркорлар, ишбилармонлар, фермер, деҳқонлар, кластерлар, зиёлиларимиз, ёшларимиз бу Конституциядаги янгиланган нормаларни амалга оширишда ўзларига манфаат сезишяпти. Биринчидан, мулк даҳлсизлигининг таъминланиши, тадбиркорлик фаолиятининг эркинлиги кучаяётгани, эмин-эркин фаолият юритаётганлиги мисолдир”, — дейди ЎзЛиДеП раиси. 

Актам Ҳайитов муддатидан олдин сайлов ўтказиш ташаббусини давлат раҳбари илгари сурганини айтиб ўтди. 

“Буни жуда ҳам тўғри қарор деб ҳисоблаймиз. Чунки, иқтисодиётимизнинг ривожланиши, бардавом бўлиши барқарор йўналишда ишларни ташкил қилишга боғлиқ. Чунки, халқимиз Конституция билан амалга оширилаётган ислоҳотларга ишончини билдирди. 

Конституцияда учта ҳокимият тармоғи ўртасидаги, бу қонун чиқарувчи, ижро ҳокимияти, суд ҳокимияти ўртасидаги ваколатлар қайта тақсимланди. Шу билан бирга, Сенат ва қонунчилик палатаси ўртасидаги ваколатлар ҳам қайта тақсимланиши билан бирга, халқимизнинг жуда катта инсон ҳуқуқлари билан, инсон қадри билан боғлиқ нормалар ўзгарди. Улар уч бараварга ошди. 

1,3 млн дан ортиқ аъзоси бўлган ЎзЛиДеП бу ташаббусни қўллаб-қувватлаши ва президентлик сайловида ўзига тегишли зарур чораларни кўришини мажлис жараёнида ҳам билдирдик ва эндиликда биз ўзимизнинг ички жараёнларимизни амалга оширишни бошлаймиз. Энг муҳими янгиланган Конституциямизни халқимизга хизмат қилиш учун, мана шу Конституциямиздан келиб чиқиб янги қонунларни қабул қилиниши ва ижро қилиниши учун фаол чораларни кўрамиз”, — дейди Ўзбекистон Либерал демократик партияси раиси Актам Ҳайитов.