Бош прокуратура Қашқадарёда давлат байроғи рангидаги тасмани тақиб юрган йигитга нисбатан қўзғатилган маъмурий ҳуқуқбузарлик ишини бекор қилди.
Ижтимоий тармоқларда Қамаши туманидаги бозорда ҳуқуқ-тартибот идоралари ходимлари Ўзбекистон байроғи рангидаги ва “Битирувчи” ёзуви бўлган тасма таққан йигитни қўлга олгани акс этган видео тарқалди. “Kun.uz”нинг Қашқадарё вилояти ИИБ матбуот хизматига таяниб ёзишича, воқеа 5 май куни Қамаши шаҳридаги “Чим” бозорида содир бўлган.
Бозорда навбатчилик қилаётган профилактика инспекторлари тасмали йигитни пайқаб, уни тўхтатиб, давлат рамзлари тўғрисидаги қонунга кўра, уни бу кўринишда тақиб юриш унга нисбатан ҳурматсизлик ҳисобланишини айтган ва тасмани олиб ташлашни сўраган.
“Фуқаро ИИБ ходимларининг қонуний талабларига бўйсунмасдан, қаршилик кўрсатган”, — дейилади хабарда.
“Натижада белгиланган тартибда Қамаши туманида яшовчи фуқаро Р.И. билан профилактик суҳбат ўтказилган", — дейилади вилоят ИИБ ахборот хизмати маълумотида. Ҳолат юзасидан фуқарога Маъмурий жавобгарлик тўғрисидаги кодекснинг “тегишли моддалари”га кўра ҳужжатлар расмийлаштирилиб, тўпланган ҳужжатлар қонуний тўхтамга келиш учун жиноят ишлари бўйича Қамаши туман судига юборилган.
Бош прокуратурага кўра, йигитга нисбатан маъмурий ҳуқуқбузарлик тўғрисида иш қўзғатиш ҳақида қарор қабул қилинган. Идора аралашуви билан йигитга нисбатан қўлланилган ушбу ноқонуний қарор бекор қилиниши таъминланган.
2022 йил ноябрда Қонунчилик палатасидаги ЎзЛиДеП фракциясининг кенгайтирилган йиғилишида “Ўзбекистон Республикасининг Давлат байроғи тўғрисида”ги қонунга тегишли ўзгартиш ва қўшимчалар киритиш ташаббусини илгари суриб, муҳокама ташкил этиш ва депутатлар орасидан ишчи гуруҳ тузиш кўзда тутилгани маълум бўлганди. Ўшанда ЎзЛиДеп лидери Актам Ҳайитов байроқ Ўзбекистон суверенитетининг рамзи эканини қайд этиб, байроқнинг кундалик ҳаётда доимий ҳамроҳга айланиши давлатда яшовчи барча миллат ва элат вакилларини жипслаштиришда муҳим ўрин тутишини таъкидлаган.
Расул Кушербаев эса қонун лойиҳасида давлат байроғидан фойдаланишдаги чекловларни олиб ташлаш, фуқароларнинг эркин фойдаланиши, эгалик қилиш имкониятларини кенгайтириш назарда тутилаётганини билдирганди.
Изоҳ (0)