O‘zbekistonda viloyat va tuman darajasida ham boshqaruv sifatini oshirish vazifasi turibdi. Bu haqda Shavkat Mirziyoyev Oliy Majlis palatalari, siyosiy partiyalar, sud va ijro etuvchi hokimiyat organlari rahbarlari hamda jamoatchilik faollari bilan referendum yakunlariga bag‘ishlangan uchrashuvda aytib o‘tdi.
Prezident O‘zbekiston demokratik taraqqiyot yo‘lini qatʼiy davom ettirishini, Konstitutsiyada bu maqsadga erishish kafolatlari yanada kuchaytirilishini ta’kidladi.
“Bizga inson va biznesning og‘irini yengil qiladigan, ularga sifatli xizmat ko‘rsatadigan ixcham va samarali boshqaruv tizimi kerak. Maʼmuriy islohotlarni aynan shu maqsadda boshladik. Birinchi bosqichda hukumat va vazirliklar ixcham qilinib, ularning ish uslubi o‘zgartirildi.
Navbatdagi vazifamiz viloyat va tuman darajasida ham boshqaruv sifatini oshirishdan iborat. Mening eng katta niyatim — odamlarni qiynayotgan muammolarni mahallaning o‘zi yechadigan xalqchil tizim yaratish”, — dedi davlat rahbari.
Shu sababli, moliya, soliq, bandlik kabi idoralarning kamida 30 foiz vakolatlarini mahalla darajasiga tushirish reja qilingan.
Davlat rahbari muammolarning yoritilishida OAVning o‘rnini ham e’tirof etdi. Prezident bugungi kunda xalq ovozi va fikrini keng jamoatchilik va davlat idoralari eʼtiboriga olib chiqayotgan eng taʼsirchan kuch, bu — ommaviy axborot vositalari va jurnalistlar ekani taʼkidladi.
“Jamiyatimizdagi ochiqlik siyosatini izchil davom ettirish maqsadida ommaviy axborot vositalari faoliyatining erkinligi, axborot olish, foydalanish va tarqatishga bo‘lgan huquqlar qatʼiy kafolatlanmoqda.
Shu bilan birga, so‘z erkinligi bu — masʼuliyat ham degani. Yaʼni, axborot makonida haqqoniylik va xolislik bosh mezon ekanini ham unutmasligimiz zarur”, — dedi davlat rahbari.
Izoh (0)