Qashqadaryo va Surxondaryo hokimlari urush qatnashchilari xonadonlarida bo‘lib, prezidentning maxsus tortig‘i — 18 million so‘m pul mukofoti va qimmatbaho sovg‘alarni o‘z egalariga topshirdi.
Surxondaryo viloyat hokimligi axborot xizmati rahbari Murodbek Davlatovning “Daryo”ga bildirishicha, Ulug‘bek Qosimov Xotira va qadrlash kuni arafasida Qumqo‘rg‘on tumanida yashovchi 100 yoshli Hayit bobo Musayev xonadonida bo‘lib, bayram bilan tabriklagan. Davlat rahbarining tabrigini o‘qib eshittirib, mukofotlarni topshirgan.
“Faxriy nuroniylarimiz viloyat hokimi bilan suhbat davomida o‘zlarining urush yillari xotiralari, o‘tgan davr qiyinchiliklari, hayot tajribalari haqida so‘zlab berishdi. Bugungi dorilomon kunlarning qadriga yetish kerakligini taʼkidlab, prezidentimiz tomonidan Ikkinchi jahon urushi qatnashchilariga ko‘rsatilayotgan doimiy g‘amxo‘rlik uchun minnatdorchilik bildirdi“, — deydi Murodbek Davlatov.
Qashqadaryo viloyati hokimligi axborot xizmati rahbari Ahror Sodiqovning “Daryo”ga xabar berishicha, Murodjon Azimov Nishon tumanida yashayotgan ikkinchi jahon urushi qatnashchisi Ro‘zi bobo Soatov xonadonida bo‘lib, prezidentning 9-may – Xotira va qadrlash kuni munosabati bilan ularga yo‘llagan tabrigini o‘qib eshittirgan. Davlat rahbari qimmatbaho sovg‘asi va 18 million so‘m bir martalik pul mukofotini tantanali topshirgan.
“Bayram munosabati bilan urush faxriyining xonadonida tashkil etilgan tadbirda Janubi-g‘arbiy maxsus harbiy okrug qo‘shinlari qo‘mondoni, general-mayor Zaynobiddin Iminov, nuroniylar, tuman hokimi, sektorlar rahbarlari, harbiylar, mahalla faollari va yoshlar ishtirok etdi. 99 yoshni qarshilayotgan Ro‘zi bobo urush xotiralari, ocharchilik davrlari, hayot tajribalari haqida so‘zlab, bugungi dorilomon kunlarning qadriga yetish kerakligini takror-takror taʼkidladi”, — deydi Ahror Sodiqov.
Qo‘shimcha qilinishicha, Surxondaryo va Qashqadaryo viloyatlarida maktab o‘quvchilari, MFY faollari va jamoatchilik Ikkinchi jahon urushida vafot etganlarni yod olib, Motamsaro ona haykali poyiga gul qo‘ymoqda. Ayni paytda hayot bo‘lgan urush qatnashchilari holidan xabar olib, ko‘ngil so‘ralmoqda.
Izoh (0)