Ўзбекистонда муддатидан илгари президентлик сайлови қачон ўтказилиши маълум қилинди

Шавкат Мирзиёев муддатидан илгари президентлик сайловини ўтказиш бўйича фармонни имзолади. Бу ҳақда Президент матбуот хизмати хабар берди. 

Хабарга кўра, Конституциянинг 110 ва 128-моддалари ҳамда Ўзбекистон Сайлов кодексининг 66-моддасига асосан:

• 2023 йил 9 июль кунига муддатидан аввал Ўзбекистон президенти сайлови тайинланди;
• мазкур фармон Марказий сайлов комиссиясига юборилиши белгиланди.

Шавкат Мирзиёев нима сабабдан муддатидан илгари президентлик сайлови ўтказилишини изоҳлаган эди.

“Нима учун қолган уч ярим йиллик президентлик муддатидан ўз ташаббусим билан воз кечяпман? Чунки асосий қонунимизга мувофиқ:

биринчидан, ҳокимиятнинг барча бўғинлари ислоҳ қилиниб, улар ўртасидаги муносабат ва мувозанат жиддий ўзгармоқда;

иккинчидан, янгиланган Конституциямиз президент, парламент, ҳукумат, вазирлар ва ҳокимлар олдига кечиктириб бўлмайдиган янги сиёсий, ижтимоий ва иқтисодий вазифаларни қўймоқда;

учинчидан, халқимиз биздан барча соҳаларда ғоят муҳим ва долзарб ўзгариш ҳамда ислоҳотларни кутмоқда;

тўртинчидан, дунёда ва минтақамизда кескин, мураккаб жараёнлар ҳукм сураётган ҳозирги вазиятда тўғри ва самарали ривожланиш йўлини излаб топиш, уни амалга ошириш энг ўткир ва долзарб масалага айланмоқда. Азиз ва муҳтарам ватандошлар, барчангиз кўриб турибсиз, олдимизга бугун янада улкан марралар қўймоқдамиз”, — деди президент.