Farg‘ona viloyati IIB ijtimoiy tarmoqlarda tarqalgan bir qiz va ikki yigit psixotrop modda bilan ushlangani aytilgan videoga munosabat bildirdi.
Ijtimoiy tarmoqlarda 15−18 yosh atrofidagi qiz va ikki nafar o‘g‘il bolani uyda psixotrop modda isteʼmol qilgani aytilgan video tarqaldi. Tasvirda ichki ishlar xodimlari bir xonada voyaga yetmagan qizning sumkasini tekshirayotganini ko‘rish mumkin.
Maʼlum qilinishicha, 22-aprel kuni Oltiariq tumanidagi “Jarqo‘rg‘on” MFYda yashovchi fuqaro M.U. 102 ga murojaat qilib, shu mahalladagi o‘ziga tegishli bo‘lgan bog‘ shiyponiga nomaʼlum shaxslar janjal orqali kirib olganini aytgan.
Shundan so‘ng profilaktika inspektorlari aytilgan manzilga yetib borgan. U yerda tumanda istiqomat qiluvchi F.M. va J.O. hamda voyaga yetmagan 15−18 yoshdagi qiz va yigit: M.R va B.A. borligi aniqlangan. Ularga nisbatan Maʼmuriy javobgarlik to‘g‘risidagi kodeksning 45-moddasi (fuqarolarning turar joyi daxlsizligini buzish) hamda 183-moddasi (mayda bezorilik) bilan hujjatlar rasmiylashtirilgan va jinoyat ishlari bo‘yicha Oltiariq tumani sudiga yuborilgan.
Sud tomonidan 4-may kuni fuqarolarning ikki nafariga yuqoridagi moddalarga asosan BHMning 3 barobari (900 ming so‘m) miqdorida jarima jazosi tayinlangan.
Shuningdek, fuqaro F.M. tuman IIBga murojaat qilib, ushbu videoni ijtimoiy tarmoqlarga tarqatgan shaxsni aniqlab, qonuniy chora ko‘rishni so‘ragan. Videotasvirlarni fuqaro H.H. tarqatgani aniqlanib, u Maʼmuriy javobgarlik to‘g‘risidagi kodeksning 462-moddasiga (shaxsga doir maʼlumotlar to‘g‘risidagi qonunchilikni buzish) ko‘ra BHMning 3 barobari miqdorida jarimaga tortilgan.
“Yuqoridagi shaxslarning yonini ko‘zdan kechirish jarayonida ularda psixotrop moddalar yoki sovuq qurollar aniqlanmaganini maʼlum qilamiz. Fuqarolardan ijtimoiy tarmoqlarda tarqalayotgan xabarlarga rasmiy munosabat bildirilmasdan turib, turli noo‘rin xulosalarga bormasliklarini so‘rab qolamiz”, — deyiladi viloyat IIB xabarida.
Kuni kecha Farg‘ona viloyatida Qirg‘izistondan olib o‘tilgan “Regapen” nomli kuchli taʼsir qiluvchi dori vositasini qariyb 15 ming AQSH dollariga sotmoqchi bo‘lgan shaxs qo‘lga olingani to‘g‘risida xabar berilgandi.
Izoh (0)