Фарғонада бир қиз ва икки йигит психотроп модда билан ушлангани айтилган видеога муносабат билдирилди

Фарғона вилояти ИИБ ижтимоий тармоқларда тарқалган бир қиз ва икки йигит психотроп модда билан ушлангани айтилган видеога муносабат билдирди.

Ижтимоий тармоқларда 15−18 ёш атрофидаги қиз ва икки нафар ўғил болани уйда психотроп модда истеъмол қилгани айтилган видео тарқалди. Тасвирда ички ишлар ходимлари бир хонада вояга етмаган қизнинг сумкасини текшираётганини кўриш мумкин. 

Маълум қилинишича, 22 апрель куни Олтиариқ туманидаги “Жарқўрғон” МФЙда яшовчи фуқаро М.У. 102 га мурожаат қилиб, шу маҳалладаги ўзига тегишли бўлган боғ шийпонига номаълум шахслар жанжал орқали кириб олганини айтган.

Шундан сўнг профилактика инспекторлари айтилган манзилга етиб борган. У ерда туманда истиқомат қилувчи Ф.М. ва Ж.О. ҳамда вояга етмаган 15−18 ёшдаги қиз ва йигит: М.Р ва Б.А. борлиги аниқланган. Уларга нисбатан Маъмурий жавобгарлик тўғрисидаги кодекснинг 45-моддаси (фуқароларнинг турар жойи дахлсизлигини бузиш) ҳамда 183-моддаси (майда безорилик) билан ҳужжатлар расмийлаштирилган ва жиноят ишлари бўйича Олтиариқ тумани судига юборилган.

Суд томонидан 4 май куни фуқароларнинг икки нафарига юқоридаги моддаларга асосан БҲМнинг 3 баробари (900 минг сўм) миқдорида жарима жазоси тайинланган.

Шунингдек, фуқаро Ф.М. туман ИИБга мурожаат қилиб, ушбу видеони ижтимоий тармоқларга тарқатган шахсни аниқлаб, қонуний чора кўришни сўраган. Видеотасвирларни фуқаро Ҳ.Ҳ. тарқатгани аниқланиб, у Маъмурий жавобгарлик тўғрисидаги кодекснинг 462-моддасига (шахсга доир маълумотлар тўғрисидаги қонунчиликни бузиш) кўра БҲМнинг 3 баробари миқдорида жаримага тортилган.

“Юқоридаги шахсларнинг ёнини кўздан кечириш жараёнида уларда психотроп моддалар ёки совуқ қуроллар аниқланмаганини маълум қиламиз. Фуқаролардан ижтимоий тармоқларда тарқалаётган хабарларга расмий муносабат билдирилмасдан туриб, турли ноўрин хулосаларга бормасликларини сўраб қоламиз”, — дейилади вилоят ИИБ хабарида.

Куни кеча Фарғона вилоятида Қирғизистондан олиб ўтилган “Регапен” номли кучли таъсир қилувчи дори воситасини қарийб 15 минг АҚШ долларига сотмоқчи бўлган шахс қўлга олингани тўғрисида хабар берилганди.