Xitoy Tashqi ishlar vazirligi 3-may kuni Kreml qarorgohiga dronlar uchirilganiga munosabat bildirdi.
Munosabatda Rossiya va Ukraina vaziyatni yanada keskinlashtirishga yordam beradigan harakatlardan tiyilishga chaqirilgan.
“Xitoyning ’Ukraina inqirozi’ bo‘yicha pozitsiyasi izchil va aniq. Tomonlar vaziyatni yanada og‘irlashtiradigan harakatlardan qochishi kerak”, — dedi Xitoy TIV matbuot kotibi Mao Nin.
Bu voqea Pekinning Ukrainaga o‘zining maxsus vakilini yuborish bo‘yicha rejalariga ta’sir qiladimi, degan savolga diplomat “Yevrosiyo masalalari bo‘yicha maxsus vakilning Ukraina va boshqa mamlakatlarga safari haqidagi ma’lumotlar o‘z vaqtida e’lon qilinadi”, deb javob berdi.
“Xitoy tomoni xalqaro hamjamiyat bilan birgalikda ’Ukraina inqirozi’ni siyosiy yo‘l bilan hal qilishda konstruktiv rol o‘ynashda davom etadi”, — deya qo‘shimcha qildi u.
Putin qarorgohiga hujum: Nimalar ma’lum?
3-may kuni Kremlga ikkita dron zarba berishga uringani haqida xabar berildi.
“Harbiy va maxsus xizmatlar tomonidan radar jangovar tizimlaridan foydalangan holda o‘z vaqtida ko‘rilgan choralar natijasida dronlar ishdan chiqarildi”, — deyiladi xabarda.
Rossiya tomoni bu harakatlarni 9-may parad arafasida amalga oshirilgan terrorchilik harakati va prezidentga suiqasd sifatida baholadi. Biroq Putin hujum payti Kremlda bo‘lmagani qayd etildi.
Internetda hujum aks etgan videolar ham paydo bo‘ldi. Birinchi dron prezidentning Kreml qarorgohi joylashgan Senat saroyi ustida portlagan, shundan so‘ng bino gumbazi qismi yonib ketgan. Ikkinchi dronning qoldiqlari Kreml hududiga tushgan.
Rossiya Tergov qo‘mitasi terrorchilik harakati (Rossiya Federatsiyasi Jinoyat kodeksining 205-moddasi) bo‘yicha jinoiy ish qo‘zg‘atgan.
Ukraina rasmiylari va prezident Zelenskiy hujumga aloqadorlikni rad etdi
Zelenskiyning so‘zlariga ko‘ra, Ukraina o‘z hududida jang olib bormoqda va hududini Rossiyadan himoya qilmoqda.
“Biz Putinga yoki Moskvaga ham hujum qilmaymiz. O‘z zaminimizda jang qilamiz, qishloq va shaharlarimizni muhofaza qilamiz. Buning uchun ham qurolimiz yetarli emas. Shuning uchun qurollardan boshqa maqsadlarda foydalanmaymiz”, — degan u.
“Bizda Kremlga tungi hujumlar haqida hech qanday ma’lumot yo‘q. Ammo, prezident Zelenskiy bir necha bor ta’kidlaganidek, Ukraina barcha mavjud kuch va vositalarni o‘z hududlarini ozod qilishga, boshqalarga hujum qilmaslikka yo‘naltiradi.
Terroristik davlat so‘zlari hayratlanarli. Terakt bu Dnepr va Umandagi kirish yo‘llari yoki Kramatorskdagi temiryo‘l vokzalidagi raketa otishmasi va boshqa ko‘plab fojialar oqibatida vayron bo‘lgan uylardir. Moskvada sodir bo‘lgan voqea, shubhasiz, 9-maygacha vaziyatning keskinlashuvi”, — deydi Zelenskiyning matbuot kotibi.
Izoh (0)