Rossiyaning Krasnodar o‘lkasi va Rostov viloyatida joylashgan neftni qayta ishlash zavodlari 4-mayga o‘tar kechasi dronlar hujumiga uchradi, deb xabar beradi Meduza.
Qayd etilishicha, hujumga uchragan “Ilinskiy” va “Novoshaxtinskiy” zavodlarida yong‘inlar yuzaga kelgan bo‘lib, olov mas’ul xodimlar tomonidan o‘chirilgan. 3-mayga o‘tar kechasi Krasnodar o‘lkasining Taman porti yaqinida neft mahsulotlari bo‘lgan rezervuar yonib ketgandi. Yong‘in deyarli bir sutka davomida o‘chirilgan.
“Zavodning endi qurilayotgan sexlararo estakadasi konstruksiyasiga uchuvchisiz uchish apparati kelib urilib, portlab ketdi. Portlash oqibatida yuzaga kelgan yong‘in zudlik bilan o‘chirildi. O‘t o‘chiruvchilar yong‘inni bartaraf etishga jalb etilmagan, korxonaning maxsus kuchlari tomonidan o‘chirilgan”, — deb yozadi Rostov gubernatori Vasiliy Golubev.
Mazkur neftni qayta ishlash zavodi 2022-yilda ham dronlar hujumiga uchragan edi. 22-iyunda korxonaga ikkita dron zarba berishi natijasida yong‘in yuzaga kelgandi. O‘shanda FVV 50 metr kvadrat hudud yongani va hech kim jabrlanmaganini ma’lum qilgan.
Rossiya hukumati 3-may kuni Kremlga ikkita dron hujum qilgani to‘g‘risida xabar bergandi. Vladimir Putin matbuot xizmati sodir bo‘lgan voqeani “prezidentga suiqasd” deb atadi, biroq uning kechasi Kremlda bo‘lishi ehtimolligi juda kam. BBC Kremlga uyushtirilgan hujum bo‘yicha rasmiy versiya e’lon qilinganidan keyin ham javobsiz qolayotgan savollarga to‘xtalib o‘tdi.
Izoh (0)