Хитой Ташқи ишлар вазирлиги 3 май куни Кремль қароргоҳига дронлар учирилганига муносабат билдирди.
Муносабатда Россия ва Украина вазиятни янада кескинлаштиришга ёрдам берадиган ҳаракатлардан тийилишга чақирилган.
“Хитойнинг ‘Украина инқирози’ бўйича позицияси изчил ва аниқ. Томонлар вазиятни янада оғирлаштирадиган ҳаракатлардан қочиши керак”, — деди Хитой ТИВ матбуот котиби Мао Нин.
Бу воқеа Пекиннинг Украинага ўзининг махсус вакилини юбориш бўйича режаларига таъсир қиладими, деган саволга дипломат “Евросиё масалалари бўйича махсус вакилнинг Украина ва бошқа мамлакатларга сафари ҳақидаги маълумотлар ўз вақтида эълон қилинади”, деб жавоб берди.
“Хитой томони халқаро ҳамжамият билан биргаликда ‘Украина инқирози’ни сиёсий йўл билан ҳал қилишда конструктив рол ўйнашда давом этади”, — дея қўшимча қилди у.
Путин қароргоҳига ҳужум: Нималар маълум?
3 май куни Кремлга иккита дрон зарба беришга урингани ҳақида хабар берилди.
“Ҳарбий ва махсус хизматлар томонидан радар жанговар тизимларидан фойдаланган ҳолда ўз вақтида кўрилган чоралар натижасида дронлар ишдан чиқарилди”, — дейилади хабарда.
Россия томони бу ҳаракатларни 9 май парад арафасида амалга оширилган террорчилик ҳаракати ва президентга суиқасд сифатида баҳолади. Бироқ Путин ҳужум пайти Кремлда бўлмагани қайд этилди.
Интернетда ҳужум акс этган видеолар ҳам пайдо бўлди. Биринчи дрон президентнинг Кремль қароргоҳи жойлашган Сенат саройи устида портлаган, шундан сўнг бино гумбази қисми ёниб кетган. Иккинчи дроннинг қолдиқлари Кремль ҳудудига тушган.
Россия Тергов қўмитаси террорчилик ҳаракати (Россия Федерацияси Жиноят кодексининг 205-моддаси) бўйича жиноий иш қўзғатган.
Украина расмийлари ва президент Зеленский ҳужумга алоқадорликни рад этди
Зеленскийнинг сўзларига кўра, Украина ўз ҳудудида жанг олиб бормоқда ва ҳудудини Россиядан ҳимоя қилмоқда.
“Биз Путинга ёки Москвага ҳам ҳужум қилмаймиз. Ўз заминимизда жанг қиламиз, қишлоқ ва шаҳарларимизни муҳофаза қиламиз. Бунинг учун ҳам қуролимиз етарли эмас. Шунинг учун қуроллардан бошқа мақсадларда фойдаланмаймиз”, — деган у.
“Бизда Кремлга тунги ҳужумлар ҳақида ҳеч қандай маълумот йўқ. Аммо, президент Зеленский бир неча бор таъкидлаганидек, Украина барча мавжуд куч ва воситаларни ўз ҳудудларини озод қилишга, бошқаларга ҳужум қилмасликка йўналтиради.
Террористик давлат сўзлари ҳайратланарли. Теракт бу Днепр ва Умандаги кириш йўллари ёки Краматорскдаги темирйўл вокзалидаги ракета отишмаси ва бошқа кўплаб фожиалар оқибатида вайрон бўлган уйлардир. Москвада содир бўлган воқеа, шубҳасиз, 9 майгача вазиятнинг кескинлашуви”, — дейди Зеленскийнинг матбуот котиби.
Изоҳ (0)