“Million” kulgi jamoasi aktyori Mirkomil Musayev “Daryo”ga bergan intervyusida jamoani tark etishi, hayotiy tajribalari va ketish qarorini qabul qilish og‘ir bo‘lgani haqida so‘zlab berdi.
“Asosiy ishim savdo-sotiq, endi shuni davom ettirsam kerak”
— Shunaqa mo‘ljal qilingandi, bu yog‘i taqdir. Hamma narsaning boshi va oxiri bor. Vaqti soati kelgan ekan, jamoa bilan xayrlashyapman. Faoliyatimni ijodning boshqa turi bilan bog‘lash niyatim yo‘q. Asosiy ishim savdo-sotiq, endi shuni davom ettirsam kerak. 10 yil ichida jamoa bilan ijod qilib, ko‘p narsa topdim, chunki 20 yildan buyon sahnadaman. 2013-yildan buyon “Million” kulgi jamoasidaman. Bu vaqt davomida yaxshi do‘st, ustozlarni topdim.
“QVZ”dan chiqqanman, hayotimda o‘z o‘rnimni topishimda “Million” kulgi jamoasining ham, “QVZ”ning ham ahamiyati katta. Hayotda turli xil insonlarga duch kelamiz, ko‘p joyda murosaga kelishimda shu narsalar yordam berdi. Xalqimiz san’atni yaxshi ko‘radi, bizni hurmat qiladi, boshqacha kutib oladi. San’atni ichida bo‘lgan insonning hurmati boshqa insonlarnikidan boshqacharoq bo‘ladi.
“Hech kim professional emas edi, hammamiz talabalikdan boshlab, professionalikka qadam qo‘ydik”
— Jamoani kimdir tark etishi boshqalarga salbiy ta’sir o‘tkazmasligi kerak. “Million” kulgi jamoasi yaratilganda qachondir bari bir sahnani tark etish niyatim bo‘lgan. Hech kim professional emas edi, hammamiz talabalikdan boshlab, professionalikka qadam qo‘ydik, bu narsa o‘z-o‘zidan san’at darajasiga chiqdi. Avlodlar almashinuviga keladigan bo‘lsak bu tabiiy hol, buni to‘g‘ri qabul qilish kerak. O‘z vaqtida yoshlarga ham o‘rin berilishi kerak, deb o‘ylayman. Ularning istagi juda baland, motivatsiyasi bor. Hozir bu narsa faqat “Million”da ko‘zga tashlanayotgan bo‘lishi mumkin, biroq vaqti kelib boshqa jamoalarda ham kuzatiladi.
“QVZ”da 2007-yildan 2013-yilgacha qanaqadir oltin avlod yetishib chiqdi. Birinchi “QVZ”dan chiqdik, keyin “Dizayn” jamoasi o‘z yo‘nalishida ketdi, keyinchalik “Comedy.uz” ham alohida faoliyat yuritdi. Kimnidir ideali bo‘lib chiqqan bo‘lsak, xursandmiz. Qarorni qabul qilish oson kechmadi, uch-to ‘rt yildan buyon shu narsani o‘ylab kelaman. Biroq og‘ir vaqtda jamoani tark eta olmadim, har yili keta olmaganimga bir sabab bo‘ldi, jamoani oxirigacha qo‘llab-quvvatlashni istadim. Hozir davom ettirishim mumkin edi, biroq hamma narsaning o‘z vaqti-soati bor.
Konsertdan batafsil reportajni quyida tomosha qilishingiz mumkin.
Izoh (0)