“Million” kulgi jamoasining 1-may kuni “Xalqlar do‘stligi” san’at saroyidagi 12 kunlik konsert dasturiga start berildi. “Daryo” muxbirlari konsert dasturidan reportaj tayyorladi.
Shu yili “Million” kulgi jamoasining 10 yillik yubiley konsert dasturi muxlislarga taqdim etilmoqda. Konsert dasturida oilaviy, jamiyatdagi ayrim muammolar hazil talqinida namoyish etilgan va musiqiy chiqishlar o‘rin olgan.
Konsert dasturi avvalida “Million” kulgi jamoasining 10 yillik chiqishi davomida ko‘rsatilgan eng yaxshi hazillar jamlanmasi muxlislarga taqdim etildi.
“Million” kulgi jamoasi yetakchisi Davron Kabulov yangi konsert dasturini taqdim etishdan oldin jamoa tarkibida ko‘p o‘zgarishlar bo‘lganini, ya’ni aktyor Mirkomil Musayev jamoani tark etganini va yangi a’zolar qo‘shilganini ma’lum qildi.
Shuningdek, “Kosmos” jamoasi tarkibida ham o‘zgarish bo‘lgan.
“Bu yil ‘Million’ jamoasining 10 yillik yubileyi. Repertuar tuzishda xalq muammolarini yumor sifatida ko‘rsatib berishga harakat qilindi. Kulgili narsa bo‘lsa ham foydali bo‘lishi kerak. Mashhur ‘ena’ yumorini yaratishimga ham qishloqi yigit bo‘lganim sababchi bo‘lgan”, — deydi jamoa a’zosi “Kosmos” jamoasi a’zosi O‘tkir Shodmonov.
.jpg)
“‘Million’ jamoasining konsert dasturida chiqishimni hech kim kutmagandi. Hamma hayron. Men teatr aktrisasiman, u yerda esa yumor. Bu jamoa trendga chiqqan san’atkorlarni sahnaga olib chiqar ekan. Mening taklif qilinishimga ham trendga chiqqan gaplarim bo‘ldi. Meni bu yerga mehmon aktrisa sifatida taklif qilishdi”, — deydi aktrisa Nilufar Hamidova.
“Mirkomil akaning jamoani tark etayotgani hammamizning kayfiyatimizni tushirdi. Izlanyapmiz, o‘rganyapmiz va muxlislarning qalbidan joy olishga harakat qilyapmiz. Yumor sohasiga umuman aloqam yo‘q, meni jamoaga ustozim Davron aka taklif qilgan. Menga ‘Navro‘z muborak’ sahnasi katta omad olib keldi”, — deydi jamoa a’zosi Dilnoza Habibullayeva.
“Bu yilgi konsert dasturida yangiliklar ham, o‘zgarishlar ham juda ko‘p. Jamoa a’zolaridan katta tajriba oldim. Yoshligimdan bu jamoaning muxlisi bo‘lganman. Sahnada qanaqadir xato qilsam, yordam berib o‘rgatishadi. Bir yilda bir yoki ikki marta konsert beradigan bo‘lsak, bir-birimizni sog‘inib yig‘ilamiz. Yulduz Usmonovani yaratgan sahnam mashhur bo‘lgan, qanchalik o‘xshatganimni muxlislar biladi”, — deydi Shahlo Alijonova.
“Million” kulgi jamoasining konsert dasturida mashhur bloger, o‘zbek shou-biznesining ko‘plab taniqli vakillari ishtirok etdi.
.jpg)
“Konsert dasturi juda ajoyib o‘tdi, ham quvonchli, ham qayg‘uli bo‘ldi”, — deydi xonanda Umidaxon.
.jpg)
“Kuldirishni bilgan jamoa yig‘latishni ham bildi. Har yili jamoadan bir kishining ketishi haqiqatan ham g‘amgin holatga tushiradi. Biroq har kimning o‘z hayot yo‘li bor”, — deydi “Oybek va Nigora” dueti xonandasi Nigora.
Konsert dasturi karnay-surnay sadolari ostida yakunlandi. Sahna ortida jamoa muxlislari, mashhur xonandalar va aktrisalar jamoaning keyingi faoliyatiga omad tilab, tilaklarini bildirdi.
“Million” yetakchisi Davron Kabulovning aytishicha, bundan buyog‘iga kulgi jamoasining yangi konsert dasturlari YouTube platformasiga joylashtirilmaydi.
Konsertdan batafsil reportajni quyida tomosha qilishingiz mumkin.
Izoh (0)