“Фаолиятимни ижоднинг бошқа тури билан боғлаш ниятим йўқ”. Миркомил Мусаев “Миллион”дан кетиш сабаби ҳақида (видео)

“Миллион” кулги жамоаси актёри Миркомил Мусаев “Дарё”га берган интервьюсида жамоани тарк этиши, ҳаётий тажрибалари ва кетиш қарорини қабул қилиш оғир бўлгани ҳақида сўзлаб берди.

“Асосий ишим савдо-сотиқ, энди шуни давом эттирсам керак”

— Шунақа мўлжал қилинганди, бу ёғи тақдир. Ҳамма нарсанинг боши ва охири бор. Вақти соати келган экан, жамоа билан хайрлашяпман. Фаолиятимни ижоднинг бошқа тури билан боғлаш ниятим йўқ. Асосий ишим савдо-сотиқ, энди шуни давом эттирсам керак. 10 йил ичида жамоа билан ижод қилиб, кўп нарса топдим, чунки 20 йилдан буён саҳнадаман. 2013 йилдан буён “Миллион” кулги жамоасидаман. Бу вақт давомида яхши дўст, устозларни топдим.

“ҚВЗ”дан чиққанман, ҳаётимда ўз ўрнимни топишимда “Миллион” кулги жамоасининг ҳам, “ҚВЗ”нинг ҳам аҳамияти катта. Ҳаётда турли хил инсонларга дуч келамиз, кўп жойда муросага келишимда шу нарсалар ёрдам берди. Халқимиз санъатни яхши кўради, бизни ҳурмат қилади, бошқача кутиб олади. Санъатни ичида бўлган инсоннинг ҳурмати бошқа инсонларникидан бошқачароқ бўлади.

“Ҳеч ким профессионал эмас эди, ҳаммамиз талабаликдан бошлаб, профессионаликка қадам қўйдик”

— Жамоани кимдир тарк этиши бошқаларга салбий таъсир ўтказмаслиги керак. “Миллион” кулги жамоаси яратилганда қачондир бари бир саҳнани тарк этиш ниятим бўлган.  Ҳеч ким профессионал эмас эди, ҳаммамиз талабаликдан бошлаб, профессионаликка қадам қўйдик, бу нарса ўз-ўзидан санъат даражасига чиқди. Авлодлар алмашинувига келадиган бўлсак бу табиий ҳол, буни тўғри қабул қилиш керак. Ўз вақтида ёшларга ҳам ўрин берилиши керак, деб ўйлайман. Уларнинг истаги жуда баланд, мотивацияси бор. Ҳозир бу нарса фақат “Миллион”да кўзга ташланаётган бўлиши мумкин, бироқ вақти келиб бошқа жамоаларда ҳам кузатилади.

“ҚВЗ”да 2007 йилдан 2013 йилгача қанақадир олтин авлод етишиб чиқди. Биринчи “ҚВЗ”дан чиқдик, кейин “Дизайн” жамоаси ўз йўналишида кетди, кейинчалик “Comedy.uz” ҳам алоҳида фаолият юритди. Кимнидир идеали бўлиб чиққан бўлсак, хурсандмиз. Қарорни қабул қилиш осон кечмади, уч-то ърт йилдан буён шу нарсани ўйлаб келаман. Бироқ оғир вақтда жамоани тарк эта олмадим, ҳар йили кета олмаганимга бир сабаб бўлди, жамоани охиригача қўллаб-қувватлашни истадим. Ҳозир давом эттиришим мумкин эди, бироқ ҳамма нарсанинг ўз вақти-соати бор.  

Концертдан батафсил репортажни қуйида томоша қилишингиз мумкин.