Toshkentning Olmazor tumanida bir nechta fuqarolar bilan savdo qilish uchun joy talashgan ayol o‘ziga benzin sepib, yoqib yuborgandi. Bosh prokuratura matbuot kotibi Hayot Shamsutdinov holat yuzasidan jinoyat ishi qo‘zg‘atilganini ma’lum qildi.
Poytaxt IIBB bergan ma’lumotga ko‘ra, voqea 2-may kuni soat 10:00 larda Olmazor tumani Qora qamish 2/4 dahasidagi savdo do‘konlaridan birining oldida yuz bergan. 1981-yilda tug‘ilgan ayol D.Q. bir nechta fuqarolar bilan savdo qilish uchun joy talashgan. So‘ngra o‘zaro kelisha olmay janjallashib, o‘zini noodatiy tutgan holda norozilik bildirib, yonida bo‘lgan yelim idishdagi benzinni ustiga quyib, o‘zini-o‘zi yoqib yuborgan. Holat aks etgan video ijtimoiy tarmoqlarda tarqalgan.
Oqibatda ayol yuzi, ikkala qo‘li, tanasining old qismi 35 foiz termik kuyishi tashxisi bilan shifoxonaga yotqizilgan.
Shuningdek, o‘tkazilgan birlamchi surishtiruv davomida D.Q. bundan oldin ham fuqarolar bilan savdo qilish uchun joy talashib janjallashgani hamda bir necha marotaba o‘zini yoqish holatlarini sodir etishga harakat qilgani, biroq xodimlar tomonidan buning oldi olingani aniqlangan.
Mazkur holat yuzasidan Jinoyat kodeksining 103-moddasi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilgan. Ayol tan jarohati olgani bo‘yicha sudga oid tibbiy ekspertizasi tayinlangan. Tergov harakatlari olib borilmoqda.
Aprel oxirlarida Toshkent shahridagi xonadonlarning birida erkak spirtli ichimlik taʼsirida o‘zini yoqib yuborgani to‘g‘risida xabar berilgandi. Mart boshlarida Andijon viloyatining Jalaquduq tumanida yashovchi 23 yoshli kelin adirlik hududida o‘ziga benzin quyib, yoqib yuborgandi.
Izoh (0)