Buxoro viloyati Shofirkon tumanida erkak 22 yildan buyon birga yashab kelayotgan rafiqasini urib, qovurg‘alari va burnini sindirdi. Viloyat IIB holat yuzasidan maʼlumot berdi.
Ayol davolanayotgan shifoxona bo‘lim boshlig‘ining bildirishicha, ayol 30-aprel kuni olib kelingan. Kelgan vaqtida tashxisi: bosh miya yopiq shikastlanishi, bosh miya chayqalishi, chap qovurg‘a 7-8-qovurg‘alarining sinishi, burun suyaklarining yopiq sinishi deb belgilangan. Hozirda ahvoli og‘ir.
Jabrlanuvchi ayol hodisa sodir bo‘lgan kundagi voqeani aytib berdi. Uning taʼkidlashicha, bu ilk bor zo‘ravonlikka uchrashi emas.
“Mast holatda keldi. Telefonda bittasi bilan gaplashib o‘tirgan edi. O‘g‘lim bilan supada o‘tirgandik. Bolamga darvozani yopib kelishini aytganimda nega gapimga gap qo‘shding, deb meni urib, do‘pposlab ketdi. O‘g‘ilchamning qo‘lidan hech nima kelmaydi, kichkina hali. Darvozani qulflab qo‘ygan edilar, qocha olmadim. Orqa eshikchani ochib, onamnikiga qochib ketdim. Bu hodisa necha marta bo‘lgan. Lekin bu darajada urmagan edi. Yaxshi bo‘lib ketarmiz, deb o‘ylar edim”, — deydi ayol.
Mazkur holat tuman IIB navbatchilik qismida tegishli tartibda qayddan o‘tkazilib, tergovga qadar tekshiruv harakatlari olib borilgan. Jinoyat kodeksining 126-moddasi 4-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)