Тошкентдаги боғчада 4 нафар қизчага тегажоғлик қилингани, воқеа “қаҳрамони” боғча директорининг 15 ёшли ўғли экани айтилмоқда

“Газета.уз” сайтида Тошкент шаҳрининг Чилонзор туманидаги болалар боғчасида 4 нафар қизчага тегажоғлик қилингани, бунда боғча директорининг 15 ёшли ўғли айбланаётгани айтилган мақола эълон қилинди.

Таъкидланишича, бундай воқеа Чилонзор туманидаги 230-сонли болалар боғчасида содир бўлган.

Нашрга бир нечта ота-оналар мурожаат қилиб, уларнинг фарзандларига Тошкент шаҳри Чилонзор туманидаги 230-сонли мактабгача таълим ташкилоти директорининг 11- ёки 9-синфида ўқувчи ўғли тегажоғлик қилганини айтган. Уларнинг сўзларига кўра, воқеа 2 май куни тушдан кейин 6 ёшли болалар гуруҳи ухлашга кирганида содир бўлган ва гумонланувчи бола 4 нафар қизчага тегажоғлик қилган.

Мухбир билан суҳбатда директор бу туҳмат эканини таъкидлаган бўлса, бошқа болаларнинг ота-оналари эса ушбу ҳолат ростдан ҳам бўлганини, уларнинг фарзандлари сўзлаб беришганини айтган.

Жабрланувчи қизчанинг бувиси қизларга директорнинг Ҳасан-Ҳусан ўғилларидан бири тегажоғлик қилган бўлиши мумкинлигини айтган.

“Директорнинг икки ўғли Ҳасан-Ҳусан ҳар доим боғчада юради. Қизчалар хонага Ҳасан кирган деб айтишяпти. Суҳбатда кирганини айтиб қўймасин деб, кирмаган болани Ҳусанни терговга киргизишяпти. Ўғил болаларнинг дадаси ҳам ўғлимни чақириб, ота-оналардан узр сўраймиз, биздан ўтди, деган гапларни айтган. Ўғлим шуларни диктофонига ёзиб олган”, — дейди у. 

Тўрт нафар қизчанинг бари 15 ёшли бола “уларнинг иштони ва ич кийимини ечиб, номақбул ҳаракатларни” амалга оширганини сўзлаб берган.

“Боғча ҳамширасининг қизи Ҳасан акамни кўргандим, келиб шу ишни қилдилар, иштонини ечдилар, деб гапириб берганди бизга. Онаси ва тарбиячиси келганидан сўнг қандай кўрасан, сен йўқ эдинг-ку, ташқарингда юргандинг-ку, деб пўписа қилганидан кейин қиз мен ёлғон гапирдим, деб қолди. Уни ҳам психологга чақиришганди, лекин онаси олиб келмади, ҳозир боғчага ҳам келмаяпти. Директор билан ҳамширанинг тили бир. Лекин Аллоҳдан қўрқмаяпти улар”, — дейди жабрланувчининг бувиси.

Суҳбатдошнинг айтишича, уларнинг фарзанди болага қаршилик кўрсатган, бироқ у куч ишлатиб, “кўзингни юмиб ол” дея, ўз ишида давом этган. “Ечманг десам, кучим етмади. Овози ҳам йўғон эди, қўрқма, кўзингни юмиб ёт, ҳеч ким кўрмаяпти, ҳамма ухлаяпти деб айтди”, деди қизча. Унинг бувиси эса “Бола шундай гапларни ўйлаб топа оладими?” — дея савол билан юзланган.

Воқеа содир бўлган вақтда Людмила исмли боғча опаси иш жойида бўлмаган. Унинг ўзи бунга “бу ерда фақат тушлик вақтигача ишлашини” сабаб қилиб кўрсатди. Қолаверса, унинг фикрича, “болачалар алдашни, айниқса, бундай гапларни тўқиб чиқаришни билмайди”. Унинг ёрдамчиси эса болаларни ухлатишга киргизиб, ўзи иккинчи тушлик олиб келиш учун чиқиб кетган бўлган.

Мазкур ҳолат юзасидан тўпланган материал бўйича Чилонзор тумани ИИО ФМБ тергов бўлими томонидан текширув ўтказилмоқда. Телефон орқали суҳбат давомида терговчи маълумот бера олмаслигини, бунинг учун пойтахт ИИББдан рухсат олиш зарурлигини таъкидлади.

Воқеа доирасида текширув бошлангач, болалар экспертизага олиб борилган. Бироқ, ота-оналарнинг сўзларига кўра, уларни фақат оғзаки сўроқ қилишган, холос. Психолог билан суҳбат эса ота-оналар ва уларсиз амалга оширилган. Суҳбат якунида эса психолог чиқиб, “бола қизларга тегинган, хулосам шу”, — деб тасдиқлаган.

“Бу — туҳмат”. Боғча директорининг фикри

Исм-фамилиясини кўрсатмасликни илтимос қилган 230-сонли МТТ директори ўғли MMA билан шуғулланиши, ҳозирда 9-синфда ўқиётгани ва 15 ёшдалигини айтди. Қолаверса, у юқоридаги айбловни рад этиб, “бунинг барчаси туҳмат эканини” таъкидлаган. Бироқ ўғлининг тарбияланувчилар ухлаётган хонага кирганини рад этмади. Унинг сўзларига кўра, ўғли хонага 3:30 ларда кириб, 3:40 ларда чиқиб кетган, яъни ичкарида 10 дақиқа бўлган.

“Ўғлимнинг ақли-ҳуши жойида. Мақтаниш эмас, боламни беш маҳал намозга солганман. Додаси бомдодни жамоат билан ўқиш керак дейди, бирга намоз ўқишади… Бу — ўсаётган болани синдириш!”, — деган боғча директори.

Боғча директори журналистдан ишга бунчалик чуқур ёндашмасликни, бу “эътибор бериб, ёритишга арзимайдиган мавзу” эканини айтган. Ва умуман ёритмасликни сўраган. Директор, шунингдек, тиббий экспертизанинг жавоби “тоза” чиққанини, орган ходимлари ҳозирча бу ҳақда ота-оналарни хабардор қилмаганини айтиб, орган ходимлари индамай туриш ва орадан 3−4 кун ўтиб, ҳаммаси унутилиб кетишини айтганини билдирган.

Гувоҳлар нима дейди?

Мазкур ҳолатни ўз кўзи билан кўрган бир қизча кечки пайт воқеани онасига сўзлаб берган. Унинг айтишича, қизчаларга Ҳасан тегинган. Онаси фарзанди Ҳасан ва Ҳусанларни яхши ажрата олиши ва улар боғчага келиб турганини қайд этган.

“Диля опам булочка олиб келгани чиқиб кетган пайтда Ҳасан ака қизларнинг иштони ва ички кийимини ечиб, мана шунақа қилди, деди. Сенга тегмадими десам, ёнимгача келди, исмимни сўради, айтдим, деди. Менга тегмади, лекин бошқа қизларни шунақа қилди, деди. Ўша куни бу воқеаларни кечаси билдим”, — деган воқеа гувоҳи бўлган қизчанинг онаси.

Пойтахт ИИББнинг “Газета.уз”га маълум қилишича, мазкур ҳолат назоратга олинган ва текширув якуни бўйича қонуний қарор қабул қилинади. Бош прокуратура ҳам мазкур воқеа юзасидан муносабат билдириб, ҳолат назоратга олинганини, натижалари ҳақида қўшимча ахборот берилишини маълум қилди.