Muomalaga layoqatsiz shaxslar va og‘ir jinoyat qilgan mahkumlarga saylovda qatnashish huquqi berilmoqda — Senat

Endilikda O‘zbekistonda muomalaga layoqatsiz shaxslar, og‘ir jinoyat sodir etgani uchun ozodlikdan mahrum qilingan mahkumlar referendum va saylovlarda ishtirok etish huquqiga ega bo‘ladi.

Bugun, 4-may kuni Senat yalpi majlisida O‘zbekistonning ayrim qonun hujjatlariga o‘zgartirish va qo‘shimchalar kiritishga doir qonun muhokama qilindi. 

Majlisda senator Narimon Umarov saylov qonunchiligiga kiritilayotgan o‘zgarishlar haqida gapirdi. 

“Oldingi tahrirdagi Konstitutsiyada muomalaga layoqatsiz deb topilgan, og‘ir va o‘ta og‘ir jinoyatlar sodir etganlik uchun sud hukmi bilan ozondlikdan mahrum etish joylarida saqlanayotgan shaxslar saylovda ishtirok etmasligi belgilangandi. Biroq, fuqarolarni saylash bilan bog‘lik konstitutsiyaviy huquqlarni yanada kafolatlash maqsadida yangilangan Konstitutsiyaga mamlakat boshqaruvida fuqarolarni yanada kengroq ishtirok etishini taʼminlashga qaratilgan qoidalar kiritilgan. Yangi Konstitutsiyaning 128-moddasiga asosan, endilikda muomalaga layoqatsiz shaxs yoki og‘ir va o‘ta og‘ir jinoyatlarni sodir etgan fuqarolar emas, balki faqat sudning qarori asosida saylov huquqlaridan mahrum etilganlargina saylovda ishtirok eta olmasligi belgilanyapti”, – dedi senator.

Narimon Umarovning qo‘shimcha qilishicha, yangi Konstitutsiya asosida “Referendum to‘g‘risida”gi qonun va Saylov kodeksi yangi tahrirda qabul qilinmoqda.

“Mazkur hujjatlarga sud tomonidan muomalaga layoqatsiz deb topilgan fuqarolar, shuningdek, og‘ir yoki o‘ta og‘ir jinoyatlar sodir etgani uchun sud hukmiga ko‘ra ozodlikdan mahrum etish joylarida saqlanayotgan shaxslar referendumda yoki saylovda ishtirok etish huquqidan faqat qonunga muvofiq hamda sudning qaroriga asosan mahrum etilishi belgilanyapti. Boshqa har qanday hollarda fuqarolarning saylov huquqlarini to‘g‘ridan-to‘g‘ri yoki bilvosita cheklashga yo‘l qo‘yilmaydi”, — dedi u.  

Avvalroq Senat mazkur qonun bilan bir qator qonunlarga o‘zgartirish va qo‘shimchalar kiritilib, fuqarolar yig‘ini raisi lavozimiga nisbatan qo‘llanilayotgan oqsoqol tushunchasi olib tashlanayotganini maʼlum qilgandi.