Эндиликда Ўзбекистонда муомалага лаёқатсиз шахслар, оғир жиноят содир этгани учун озодликдан маҳрум қилинган маҳкумлар референдум ва сайловларда иштирок этиш ҳуқуқига эга бўлади.
Бугун, 4 май куни Сенат ялпи мажлисида Ўзбекистоннинг айрим қонун ҳужжатларига ўзгартириш ва қўшимчалар киритишга доир қонун муҳокама қилинди.
Мажлисда сенатор Наримон Умаров сайлов қонунчилигига киритилаётган ўзгаришлар ҳақида гапирди.
“Олдинги таҳрирдаги Конституцияда муомалага лаёқатсиз деб топилган, оғир ва ўта оғир жиноятлар содир этганлик учун суд ҳукми билан озондликдан маҳрум этиш жойларида сақланаётган шахслар сайловда иштирок этмаслиги белгиланганди. Бироқ, фуқароларни сайлаш билан боғлик конституциявий ҳуқуқларни янада кафолатлаш мақсадида янгиланган Конституцияга мамлакат бошқарувида фуқароларни янада кенгроқ иштирок этишини таъминлашга қаратилган қоидалар киритилган. Янги Конституциянинг 128-моддасига асосан, эндиликда муомалага лаёқатсиз шахс ёки оғир ва ўта оғир жиноятларни содир этган фуқаролар эмас, балки фақат суднинг қарори асосида сайлов ҳуқуқларидан маҳрум этилганларгина сайловда иштирок эта олмаслиги белгиланяпти”, – деди сенатор.
Наримон Умаровнинг қўшимча қилишича, янги Конституция асосида “Референдум тўғрисида”ги қонун ва Сайлов кодекси янги таҳрирда қабул қилинмоқда.
“Мазкур ҳужжатларга суд томонидан муомалага лаёқатсиз деб топилган фуқаролар, шунингдек, оғир ёки ўта оғир жиноятлар содир этгани учун суд ҳукмига кўра озодликдан маҳрум этиш жойларида сақланаётган шахслар референдумда ёки сайловда иштирок этиш ҳуқуқидан фақат қонунга мувофиқ ҳамда суднинг қарорига асосан маҳрум этилиши белгиланяпти. Бошқа ҳар қандай ҳолларда фуқароларнинг сайлов ҳуқуқларини тўғридан-тўғри ёки билвосита чеклашга йўл қўйилмайди”, — деди у.
Аввалроқ Сенат мазкур қонун билан бир қатор қонунларга ўзгартириш ва қўшимчалар киритилиб, фуқаролар йиғини раиси лавозимига нисбатан қўлланилаётган оқсоқол тушунчаси олиб ташланаётганини маълум қилганди.
Изоҳ (0)