Toshkentdagi Seul bog‘i Koreyadan ajratiladigan mablag‘lar hisobidan rekonstruksiya qilinadi. Bu haqda Toshkent shahar hokimligi axborot xizmati xabar berdi.
Xabarga ko‘ra, Toshkent shahar hokimi vazifasini bajaruvchi Shavkat Umurzoqov Koreyaning O‘zbekistondagi favqulodda va muxtor elchisi Kim Xi Sang bilan uchrashdi. Toshkent va Seul o‘rtasida yo‘lga qo‘yilgan birodarlik aloqalarini kengaytirish va shaharlarning birgalikdagi rivojlanish rejalarini amalga oshirish, Koreya biznesidagi yutuqlarni O‘zbekiston va Toshkentda qo‘llash ahamiyatli bo‘lishi taʼkidlandi.
Suhbat davomida Toshkentdagi Seul bog‘ini rekonstruksiya qilish hamda investitsiya loyihalari samaradorligini oshirish masalasi alohida muhokama etildi. Kim Xi Sang joriy yilda Seul shahri meriyasi tomonidan bog‘ni qayta taʼmirlash uchun 340 ming AQSH dollari, Koreya Tashqi ishlar vazirligi tomonidan esa 152 ming AQSH dollari miqdorida mablag‘ ajratish rejalashtirilayotganini bildirib, bu ishlar o‘z muddatida, yuqori sifatda bajarilishi uchun Toshkent shahri hokimligining amaliy yordami muhimligini qayd etdi.
Shuningdek, Koreya investitsiyasi asosida ishga tushishi mo‘ljallangan markaz faoliyatining tashkiliy-huquqiy masalalarini bayon etdi.
Shavkat Umurzoqov Seul bog‘i ikki mamlakat do‘stligi ramzi ekanligiga eʼtibor qaratib, qayta taʼmirlash ishlari boshlanguniga qadar ham bog‘ni tartibga keltirish ishlari amalga oshirilishi va rekonstruksiya jarayonida ham zarur amaliy yordam ko‘rsatilishini bildirdi.
Toshkentdagi Seul bog‘i
Toshkentda Bobur bog‘i hududida qurilgan Seul bog‘ining ochilish marosimi 2014-yil bo‘lib o‘tgan. Uning umumiy maydoni 17,5 gektarni, ko‘kalamzorlashtirilgan hudud 7 gektarni tashkil etadi. Koreya tomonidan moliyalashtirilgan Toshkentdagi Seul bog‘ini qurishdan asosiy maqsad Janubiy Koreya madaniyati, an’analari, milliy xususiyatlarini targ‘ib etishga, shuningdek, mamlakatlar o‘rtasida ikki tomonlama hamkorlikni rivojlantirishga ko‘maklashishdan iborat bo‘ldi.
Izoh (0)