Toshkentda Bobur bog‘i hududida qurilgan Seul bog‘ining ochilish marosimi bo‘lib o‘tdi, deya xabar bermoqda UzDaily.
Tadbirda Seul meriyasi delegatsiyasi va Toshkent hokimiyati vakillari, shuningdek madaniy markazlar vakillari ishtirok etdi.
Nashrning ta’riflashicha, bog‘da bir xil uslubdagi biroq turlicha vazifaga ega inshootlar mavjud.
Bu yerda qo‘ng‘iroqli pavilyon ham bo‘lib, unga birinchi zarbani hokim Rahmonbek Usmonov va Koreya Respublikasining O‘zbekistondagi elchisi Li Uk Xyon berdi.
Seul bog‘i poytaxtdagi Bobur istirohat bog‘i hududida joylashgan bo‘lib, uning umumiy maydoni 17,5 gektarni, ko‘kalamzorlashtirilgan hudud 7 gektarni tashkil etadi.
Koreya tomonidan moliyalashtirilgan Toshkentdagi “Seul bog‘i”ni qurishdan asosiy maqsad Janubiy Koreya madaniyati, an’analari, milliy xususiyatlarini targ‘ib etishga, shuningdek, mamlakatlar o‘rtasida ikki tomonlama hamkorlikni rivojlantirishga ko‘maklashishdan iborat bo‘ldi.
Ta’kidlash joiz, Islom Karimovning 2010-yil fevral oyida Janubiy Koreyaga qilgan tashrifi chog‘ida Toshkent va Seul shaharlari ma’muriyatlari vakillari o‘rtasida Toshkentdagi “Seul bog‘i”ni qurish bo‘yicha kelishuv imzolangan edi.
Izoh (0)