“Nemolchi.uz” loyihasi muallifi o‘lim tahdidi sababli O‘zbekistonni vaqtincha tark etdi

Zo‘ravonlikka qarshi kurashuvchi “Ne molchi” loyihasi asoschisi Irina Matviyenko o‘lim tahdidi tufayli O‘zbekistonni vaqtincha tark etdi. IIV holat yuzasidan maʼlumot berdi.

Irina Matviyenko o‘zining sahifalarida bo‘lgan voqea haqida aytib bergan. Unga ko‘ra, aprel oyida unga o‘lim tahdidi bilan xabar kelgan. Shundan so‘ng u psixologga murojaat qilgan va Tbilisiga ketishga qaror qilgan. 

“Hech qachon tahdid meni bunchalik qo‘rqitadi, deb o‘ylamagan edim. Birgina tahdid sabab O‘zbekistondan ketishim xayolimga ham kelmagandi”, deb yozgan u.

Ichki ishlar vazirligi axborot xizmati holat yuzasidan maʼlumot berib, hozirda jurnalistga kelgan tahdidli xabar Tezkor qidiruv departamenti Kiberxavfsizlik markazi tomonidan o‘rganilayotganini maʼlum qildi.

“Jamoat faoli Irina Matviyenkoning shaxsiy akkauntiga yuborilgan tahdidli xabar O‘zbekiston Respublikasi Ichki ishlar vazirligi Tezkor qidiruv departamenti Kiberxavfsizlik markazi tomonidan o‘rganilmoqda. 

O‘rganish natijalari bo‘yicha holatga huquqiy baho beriladi”, deyiladi IIV bayonotida.