“Prezident bilan uchrashganingizda uka sifatida meni tavsiya qiling”. Zoir Mirzayev qabulida bo‘lgan murojaatchi vazirlikka daʼvogarligini aytdi

Toshkent viloyati hokimi Zoir Mirzayev qabulida bo‘lgan murojaatchi vazir lavozimiga daʼvogar ekanini aytib, viloyat hokimidan uni prezidentga tavsiya qilishini so‘radi. Bu haqda Toshkent viloyati hokimining Bo‘ka tumanidagi sayyor qabulida so‘z bordi.

Murojaatchi Saydulla Jo‘rayev viloyat hokimi Zoir Mirzayev qabulida bo‘lib, muammolari haqida aytar ekan, O‘zbekiston prezidentga bir necha marotaba murojaat qilib, Aloqa vaziri bo‘lmoqchiligini aytadi.

“Men Shavkat Miromonovichga ikki yil davomida murojaat qilib, Aloqa vaziri lavozimiga daʼvogarman, meni vazir lavozimiga oling deyapman. Meni vazir qilib tayinlash bo‘yicha hech qayerda suhbat ham qilishmayapti-da”, — deydi viloyat hokimi qabulida bo‘lgan fuqaro.

Mazkur murojaatga javob bergan Toshkent viloyati hokimi O‘zbekistonda Aloqa vaziri lavozimi ayni paytda vakant emasligini aytadi. Bu gapga javoban esa murojaatchi Zoir Mirzayevga “Meni uka sifatida prezidentga taklif qiling”, — deydi.

Murojaatchi fikrini tinglagan Zoir Mirzayev uni Davlat xizmatlarini rivojlantirish agentligiga taklif qilib, kadrlar zaxirasi shu tashkilot tomonidan amalga oshirilishini, shu sabab o‘sha yerga murojaat qilishi kerakligini tushuntirib, bu borada unga viloyat hokimligi vakili yordam berishini maʼlum qiladi.