“Bunga masʼul shaxs xatosi sabab bo‘lgan” — Anvar Jo‘rayev elektrobuslar bekatlarga jadvaldagi vaqtdan nega kechikkaniga izoh berdi

Ijtimoiy tarmoqlarda Toshkent shahriga olib kelingan yangi elektrobuslarni zaryadlashda muammolar paydo bo‘lgani, transport vositalari grafik asosida bekatlarga o‘z vaqtida kelmayotgani to‘g‘risida xabar tarqalgandi. “Toshshahartransxizmat” AJ raisi Anvar Jo‘rayev “Daryo” muxbiriga bergan intervyusida ayrim elektrobuslar nega jadvaldan kech qolgani sababini tushuntirdi.

Anvar Jo‘rayevning aytishicha, avtobus parki masʼul xodimining elektrobuslar jadvalini eng tig‘iz vaqtda ishni noto‘g‘ri taqsimlagani sabab intervalning cho‘zilishi yuzaga kelgan.

“O‘tgan kuni 28-avtobus yo‘nalishida 20-25 daqiqalik oraliq intervalning paydo bo‘lganiga sabab mutasaddi rahbarlarning ishni to‘g‘ri taqsimlamagani bilan bog‘liq. Bu xatosi uchun ularga nisbatan intizomiy chora ko‘rildi. Bunday hol takrorlamasligi uchun barcha — 8 ta avtokorxona rahbarlari bilan yig‘ilish o‘tkazilib, jadvallarni to‘g‘ri tashkil etilishi zarurligi tushuntirildi. Quvvatlash stansiyalarini to‘g‘ri ishlatish bo‘yicha ko‘rsatmalar berildi”, – dedi tashkilot rahbari.

Anvar Jo‘rayevning qo‘shicha qilishicha, ayni paytda uchta avtobus saroyida elektrobuslarni quvvatlash stansiyalari ishlamoqda.

“Bugungi kunda 1-, 7- va 8-avtobus saroylarida elektrobuslarni quvvatlash stansiyalari ishga tushirilgan. Qolgan korxonalarda montaj ishlari olib borilyapti. Yangi elektrobuslar aprel oyida 150 ta quvvatlash stansiyalari bilan birga olib kelingan. Ular may oyi yakunigacha barcha avtokorxonalarga o‘rnatilib, ishga tushiriladi va elektrobuslarni zaryadlash bilan bog‘liq kamchiliklar bartaraf etiladi”, – deya maʼlum qildi u.

Hozirda “Toshshahartransxizmat”ning “8-avtobus saroyi” filialida 30 ta va “7-Avtobus saroyi” filialida 28 ta elektr stansiyalari to‘liq ishga tushirilgan. Mazkur stansiyalar elektrobuslarni 4-5 soat davomida to‘liq quvvatlash imkoniyatini bermoqda. Tez kunlarda avtobus saroylari hududida qurilayotgan 80 ta elektr quvvatlash stansiyalari foydalanishga topshirilishi belgilangan.

Avvalroq Anvar Jo‘rayev Toshkentda avtobus tomidagi qoplama nega qo‘porilib tushganiga izoh bergandi.