Тошкент вилояти ҳокими Зоир Мирзаев қабулида бўлган мурожаатчи вазир лавозимига даъвогар эканини айтиб, вилоят ҳокимидан уни президентга тавсия қилишини сўради. Бу ҳақда Тошкент вилояти ҳокимининг Бўка туманидаги сайёр қабулида сўз борди.
Мурожаатчи Сайдулла Жўраев вилоят ҳокими Зоир Мирзаев қабулида бўлиб, муаммолари ҳақида айтар экан, Ўзбекистон президентга бир неча маротаба мурожаат қилиб, Алоқа вазири бўлмоқчилигини айтади.
“Мен Шавкат Миромоновичга икки йил давомида мурожаат қилиб, Алоқа вазири лавозимига даъвогарман, мени вазир лавозимига олинг деяпман. Мени вазир қилиб тайинлаш бўйича ҳеч қаерда суҳбат ҳам қилишмаяпти-да”, — дейди вилоят ҳокими қабулида бўлган фуқаро.
Мазкур мурожаатга жавоб берган Тошкент вилояти ҳокими Ўзбекистонда Алоқа вазири лавозими айни пайтда вакант эмаслигини айтади. Бу гапга жавобан эса мурожаатчи Зоир Мирзаевга “Мени ука сифатида президентга таклиф қилинг”, — дейди.
Мурожаатчи фикрини тинглаган Зоир Мирзаев уни Давлат хизматларини ривожлантириш агентлигига таклиф қилиб, кадрлар захираси шу ташкилот томонидан амалга оширилишини, шу сабаб ўша ерга мурожаат қилиши кераклигини тушунтириб, бу борада унга вилоят ҳокимлиги вакили ёрдам беришини маълум қилади.
Изоҳ (0)