Ozarbayjonning Sumgait shahrida sambo to‘garagi murabbiyi 7 yoshli bolaga tan jarohati yetkazib, uning o‘limiga sabab bo‘ldi.
“Qafqazinfo.az”ning xabar qilishicha, 1994-yilda tug‘ilgan Mehman Xalilov 29-aprel kuni Sumgait sport maktabidagi to‘garak jarayonida shogirdi Farid Bakarovning o‘limiga sabab bo‘lgan tan jarohati yetkazgan.
Tarmoqlarda holat aks etgan video tarqalgan. Unda murabbiy 7 yoshli bolaga zarba bergani, boshining ikki yonida ushlab tepaga ko‘targani va yerga otib yuborgani, yana bolaning bo‘yin qismiga usul ishlatgani ko‘ringan. Bola yerda yotgan vaqtda uning tana qismiga bir necha bor tepgan. Shuningdek, murabbiy boshqa shogirdlariga ham kuch ishlatgan.
Tergov jarayonlarining dastlabki hisoboti taqdim etilgan. Unda qayd etilishicha, Bakarov olgan tan jarohatlari oqibatida holsiz holatga kelib qolgan. Murabbiy holat yuzasidan bolaning ota-onasini ogohlantirmay, uni shifoxonaga olib borgan. Keyin esa uyiga olib borgan va bola mashg‘ulot vaqtida yiqilib tushganini aytgan.
Keyinroq ota-ona Faridni yana shifoxonaga olib borgan va o‘sha yerda yosh sportchi vafot etgan. Tibbiy ko‘rik xulosalariga ko‘ra, bolaning bo‘yin qismida sinish yuzaga kelgan va bu uning o‘limiga sabab bo‘lgan.
Mehman Xalilov hibsga olingan. Unga “Ehtiyotsizlik oqibatida jabrlanuvchining o‘limiga sabab bo‘lgan qasddan badanga og‘ir shikast yetkazish” holati bo‘yicha ayblov qo‘yilmoqda.
Shuningdek, politsiya sport maktabidagi boshqa videoyozuvlarni ham o‘rganmoqda. Xalilov mashg‘ulotlar jarayonida boshqa vaziyatlarda ham bolalarga kuch ishlatgan bo‘lishi mumkinligi taxmin qilinmoqda. Ayni vaqtda tergov jarayonlari davom etyapti.
Mehman Xalilov — 1994-yilning 15-sentabrida Ozarbayjonda tug‘ilgan. Sambo bo‘yicha 2019-yilgi Yevropa o‘yinlari bronza medali sohibi, shuningdek, u ikki karra (2018, 2023) Yevropa chempionati bronza medali egasi hisoblanadi.
Izoh (0)