Озарбайжоннинг Сумгаит шаҳрида самбо тўгараги мураббийи 7 ёшли болага тан жароҳати етказиб, унинг ўлимига сабаб бўлди.
“Qafqazinfo.az”нинг хабар қилишича, 1994 йилда туғилган Меҳман Халилов 29 апрель куни Сумгаит спорт мактабидаги тўгарак жараёнида шогирди Фарид Бакаровнинг ўлимига сабаб бўлган тан жароҳати етказган.
Тармоқларда ҳолат акс этган видео тарқалган. Унда мураббий 7 ёшли болага зарба бергани, бошининг икки ёнида ушлаб тепага кўтаргани ва ерга отиб юборгани, яна боланинг бўйин қисмига усул ишлатгани кўринган. Бола ерда ётган вақтда унинг тана қисмига бир неча бор тепган. Шунингдек, мураббий бошқа шогирдларига ҳам куч ишлатган.
Тергов жараёнларининг дастлабки ҳисоботи тақдим этилган. Унда қайд этилишича, Бакаров олган тан жароҳатлари оқибатида ҳолсиз ҳолатга келиб қолган. Мураббий ҳолат юзасидан боланинг ота-онасини огоҳлантирмай, уни шифохонага олиб борган. Кейин эса уйига олиб борган ва бола машғулот вақтида йиқилиб тушганини айтган.
Кейинроқ ота-она Фаридни яна шифохонага олиб борган ва ўша ерда ёш спортчи вафот этган. Тиббий кўрик хулосаларига кўра, боланинг бўйин қисмида синиш юзага келган ва бу унинг ўлимига сабаб бўлган.
Меҳман Халилов ҳибсга олинган. Унга “Эҳтиётсизлик оқибатида жабрланувчининг ўлимига сабаб бўлган қасддан баданга оғир шикаст етказиш” ҳолати бўйича айблов қўйилмоқда.
Шунингдек, полиция спорт мактабидаги бошқа видеоёзувларни ҳам ўрганмоқда. Халилов машғулотлар жараёнида бошқа вазиятларда ҳам болаларга куч ишлатган бўлиши мумкинлиги тахмин қилинмоқда. Айни вақтда тергов жараёнлари давом этяпти.
Меҳман Халилов — 1994 йилнинг 15 сентябрида Озарбайжонда туғилган. Самбо бўйича 2019 йилги Европа ўйинлари бронза медали соҳиби, шунингдек, у икки карра (2018, 2023) Европа чемпионати бронза медали эгаси ҳисобланади.
Изоҳ (0)