Жиззах вилояти бандлик бош бошқармаси мансабдори қалбаки сертификатни 1 миллион 100 минг сўмга сотаётган вақтида вилоят ички ишлар органлари ходимлари томонидан процессуал тартибда ушланди. Бу ҳақда вилоят ИИБ ахборот хизмати хабар берди.
Хабарга кўра, 1989 йилда Фориш туманида туғилган, Шароф Рашидов туманида жойлашган “Олмачи” маҳалласида яшовчи ушбу мансабдор бир аёлнинг укаси номига касб бўйича мутахассисликка эгалик тўғрисида сертификат ясаб, сотишни таклиф этган. Аёл бу ҳақда вилоят ИИОга мурожаат қилиб, унга нисбатан қонуний чора кўришни сўраган.
Мазкур ариза асосида ички ишлар органлари томонидан тезкор тадбир ўтказилди. Жараёнда айбдор ўзи меҳнат қилаётган ташкилот олдида мурожаатчига қалбаки сертификатни 1 миллион 100 минг сўмга сотаётган вақтда далилий ашёлар билан ушланган.
Тадбир давомида унинг хонаси кўздан кечирилганда 117 дона ёзилмаган ҳамда 25 дона муҳр босилган сертификат бланкалари, 8 дона тижорат банки сертификати, икки дона фахрий ёрлиқ, икки дона компьютер, бир донадан принтер ва флешкарта ҳамда бир дона қалбаки муҳр ҳужжатлаштириб олинган.
Ҳолат юзасидан Жиноят кодексининг 228-моддаси 1-қисми ҳамда 168-моддаси 3-қисми билан жиноят иши қўзғатилган.
Аввалроқ Фарғона вилояти Ўзбекистон тумани ҳокимлигида ишловчи шахс 4 минг доллар пора олаётган вақтда ушлангани хабар қилинган эди. Шунингдек, Бухоро вилояти Жондор туманида маҳалла фуқаролар йиғини раиси 400 минг сўм билан фуқарони “темир дафтар”га киритиб қўймоқчи бўлгани ҳақида хабар берилганди.
Изоҳ (0)