Ijtimoiy tarmoqlarda bir erkak YPX xodimlari bilan janjallashib, ularni haqorat qilayotgani aks etgan video tarqaldi. Buxoro viloyati IIB holat yuzasidan ma’lumot berdi.
Ma’lum qilinishicha, 22-aprel kuni fuqaro N.O‘. Buxoro viloyati IIBning 102 markazlashgan tizimiga murojaat qilib, IIB xodimlari bilan o‘rtalarida kelishmovchilik yuzaga kelganini bildirgan. Mazkur xabar Olot tumani IIBda tegishli tartibda ro‘yxatga olinib, masʼul sohaviy xizmatlar xodimlari tomonidan o‘rganilgan.
Aniqlanishicha, 22-aprel kuni soat 16:00 larda Buxoro viloyati IIB JXX YHXB 5-safarbar guruh YPX inspektorlari katta serjant J.S. hamda safdor K.B. o‘z xizmat hududi hisoblangan, tuman markazidagi Maʼrifat ko‘chasida xizmat olib borayotgan vaqtida, Nexia’ni boshqarib kelayotgan fuqaro F.J. shu ko‘chani kesib o‘tadigan yo‘lni ajratib turuvchi beton to‘siqqa borib urilganiga guvoh bo‘lgan. Ular holatni rasmiylashtirish maqsadida hodisa joyiga zudlik bilan yetib kelgan.
Shu vaqtda mazkur holatga umuman aloqasi bo‘lmagan, Buxoro viloyati Davlat soliq boshqarmasi Qorako‘l tumani bo‘limi maʼmuriy amaliyot yuristi bo‘lgan N.O‘. (1993-yilda tug‘ilgan) hodisa joyiga yetib kelib, hech bir sababsiz holatni rasmiylashtirayotgan IIB xodimlarining xizmat faoliyatiga faol qarshilik ko‘rsatgan. U xizmat vazifalarini bajarib turgan xodimlarni turli nojo‘ya so‘zlar bilan haqorat qilib, kuch ishlatib, turli darajadagi tan jarohatlari yetkazgan.
Olib borilgan o‘rganishlar hamda dastlabki tibbiy tekshiruv maʼlumotnomasiga ko‘ra, mazkur hodisa natijasida katta serjant S.J.ning o‘ng qo‘l 4-, 5-barmoqlarida hamda o‘ng qo‘l tirsak sohasida shilinma, safdor B.K.ning esa bo‘yin sohasida shilinma kabi “sog‘liqning buzilishiga sababchi bo‘lmagan yengil shikast” toifasiga kiruvchi tan jarohatlari yetkazilgani aniqlangan.
Mazkur holat sodir bo‘lgan vaqtda katta serjant S.J. hamda safdor B.K. hushyor holda, xizmat vaqti hamda xizmat kiyimida bo‘lgan.
Hozirda ushbu holat yuzasidan Olot tumani prokuraturasi tomonidan tergovga qadar tekshiruv harakatlari olib borilmoqda.
Izoh (0)