Farg‘ona viloyati Marg‘ilon shahrida firibgarlik jinoyatini sodir etib, tergov organlaridan qochib yurgan shaxs qo‘lga olindi. Bu haqda viloyat Ichki ishlar boshqarmasi axborot xizmati xabar berdi.
Ma’lum qilinishicha, 27-mart kuni IIBga fuqaro N.I. ariza bilan murojaat qilib, unga fuqaro M.M. Malibu-2 avtomashinasini 6 ming dollarga sotib, oradan qisqa vaqt o‘tib mashinani qayta olib qo‘yganini, pullarini esa qaytarmayotganini aytib, zo‘ravonlik bilan moddiy zarar yetkazgan shaxsga nisbatan chora ko‘rishni so‘ragan.
Holat yuzasidan Jinoyat kodeksining 168-moddasi 2-qismi “a” bandi bilan jinoyat ishi qo‘zg‘atilib, ayblanuvchi M.M. tergov organlaridan yashiringani uchun qidiruv e’lon qilingan. 26-aprel kuni u yashash xonadonida ekani haqida tezkor ma’lumot olinib, tezkor-qidiruv xizmati tomonidan Ichki ishlar organlarining maxsus xizmatlari jalb etilgan holda qo‘lga olingan.
Qo‘lga olish jarayonida ayblanuvchi va uning yaqin qarindoshlari Ichki ishlar organlari xodimlariga nisbatan faol qarshilik ko‘rsatishgani sababli ular qonunda belgilangan tartibda maxsus texnika vositalarini qo‘llash orqali zararsizlantirilgan. Holat yuzasidan prokuratura organlari tomonidan tegishli tartibda o‘rganish ishlari olib borilmoqda.
Izoh (0)