O‘zbekiston BMT Yevropa iqtisodiy komissiyasining radioaktiv chiqindixonalar xavfsizligini taʼminlash yuzasidan tavsiyalarini o‘rganib chiqdi va bu borada maxsus ishchi guruhni tashkil qildi.
Qayd etilishicha, O‘zbekiston Qozog‘iston va Tojikistondan keyin mintaqada bunday ishchi guruhini tashkil qilgan uchinchi davlatga aylangan. Idoralararo ishchi guruh sanoat xavfsizligi, suv resurslari uchun masʼul organlar, shuningdek, xususiy sektor, ilmiy doiralar va nodavlat notijorat tashkilotlari o‘rtasida muvofiqlashtirish va hamkorlik qilish uchun platforma vazifasini o‘taydi.
Ma’lumotlarga ko‘ra, bugungi kunda O‘zbekistonda 41 ta radioaktiv va boshqa zararli chiqindilar saqlanadigan joylar mavjud. BMTning Yevropa iqtisodiy komissiyasi Shveysariya Atrof-muhitni himoya qilish federal boshqarmasi moliyaviy ko‘magi asosida mazkur guruhga joylarda minaqalararo darajada chiqindixonalar xavfsizligini taʼminlash masalasini o‘rgatadi.
BMT xabarida taʼkidlanishicha, O‘zbekiston jahondagi yirik oltin va uran qazib oluvchi davlat hisoblanadi. Kelgusida bu sohadagi ishlab chiqarish yanada ko‘payishi kutilmoqda, buning ortidan esa radioaktiv va zararli chiqindixonalar ham ko‘payadi.
Aprel o‘rtalarida O‘zbekistonda so‘nggi 15 yil ichida yillik suv hajmi aholi jon boshiga 3048 metr kubdan 1589 metr kubgacha kamaygani ma'lum qilingandi. Jahon bankining tahliliy ko‘rsatkichlariga ko‘ra, 2050-yilga borib O‘zbekistonda suvga bo‘lgan talab 59 kub kilometrdan 62—63 kub kilometrgacha oshadi va mavjud suv resurslari 57 kub kilometrdan 52—53 kub kilometrgacha kamayadi, bu esa joriy suv tanqisligini (2 kub kilometrdan 11—12 kub kilometrgacha) besh barobarga oshiradi.
Izoh (0)