Ўзбекистон БМТ Европа иқтисодий комиссиясининг радиоактив чиқиндихоналар хавфсизлигини таъминлаш юзасидан тавсияларини ўрганиб чиқди ва бу борада махсус ишчи гуруҳни ташкил қилди.
Қайд этилишича, Ўзбекистон Қозоғистон ва Тожикистондан кейин минтақада бундай ишчи гуруҳини ташкил қилган учинчи давлатга айланган. Идоралараро ишчи гуруҳ саноат хавфсизлиги, сув ресурслари учун масъул органлар, шунингдек, хусусий сектор, илмий доиралар ва нодавлат нотижорат ташкилотлари ўртасида мувофиқлаштириш ва ҳамкорлик қилиш учун платформа вазифасини ўтайди.
Маълумотларга кўра, бугунги кунда Ўзбекистонда 41 та радиоактив ва бошқа зарарли чиқиндилар сақланадиган жойлар мавжуд. БМТнинг Европа иқтисодий комиссияси Швейцария Атроф-муҳитни ҳимоя қилиш федерал бошқармаси молиявий кўмаги асосида мазкур гуруҳга жойларда минақалараро даражада чиқиндихоналар хавфсизлигини таъминлаш масаласини ўргатади.
БМТ хабарида таъкидланишича, Ўзбекистон жаҳондаги йирик олтин ва уран қазиб олувчи давлат ҳисобланади. Келгусида бу соҳадаги ишлаб чиқариш янада кўпайиши кутилмоқда, бунинг ортидан эса радиоактив ва зарарли чиқиндихоналар ҳам кўпаяди.
Апрель ўрталарида Ўзбекистонда сўнгги 15 йил ичида йиллик сув ҳажми аҳоли жон бошига 3048 метр кубдан 1589 метр кубгача камайгани маълум қилинганди. Жаҳон банкининг таҳлилий кўрсаткичларига кўра, 2050 йилга бориб Ўзбекистонда сувга бўлган талаб 59 куб километрдан 62—63 куб километргача ошади ва мавжуд сув ресурслари 57 куб километрдан 52—53 куб километргача камаяди, бу эса жорий сув танқислигини (2 куб километрдан 11—12 куб километргача) беш баробарга оширади.
Изоҳ (0)