O‘zbekistonning Ispaniyadagi elchixonasi tomonidan suvni tozalash sohasidagi muammolarni hal qilish bo‘yicha Ispaniyaning AZUD kompaniyasi, Valensiyadagi Silkway Valensiya o‘zbek—ispan savdo-investitsiya uyi va Qoraqalpog‘iston Respublikasi Vazirlar Kengashi, mutasaddi vazirlik va idoralari o‘rtasida vedeoaloqa orqali muzokaralar tashkil etildi. Bu haqda “Dunyo” agentligi xabar berdi.
AZUD shtab-kvartirasi Ispaniyada joylashgan 30 yildan ortiq tajribaga ega bo‘lgan global kompaniya hisoblanib, uning Hindiston, Meksika, Braziliya, Xitoy va Singapurda sho‘ba korxonalari mavjud. Kompaniya diskli filtrlashni ishlab chiqarish va joriy etish, shuningdek, sanoat, qishloq xo‘jaligi va kommunal sohalarda suvni tozalash sohasidagi muammolarini hal qilish bo‘yicha jahondagi yetakchi kompaniyalardan biri hisoblanadi.
Suhbat chog‘ida ispan kompaniyasining bosh texnologi Pablo Ruiz hamda mintaqaviy menejeri Luis Alted Qoraqalpog‘iston Respublikasi Vazirlar Kengashi raisi o‘rinbosari, investitsiyalar, savdo va sanoat vaziri Azamat Uteuliyev hamda qator vazirlik va idoralar mutasaddi rahbarlariga AZUD kompaniyasi tomonidan ishlab chiqariladigan kompakt suv tozalash uskunalari, jumladan, ichimlik va qishloq xo‘jaligi uchun sho‘r suvni tuzsizlantirish texnologiyalari hamda quyosh energiyasi yordamida ishlaydigan muqim va mobil uskunalar to‘g‘risida taqdimot o‘tkazdi. Ushbu texnologiyalar asosida ispan kompaniyasi dunyoning ko‘plab mamlakatlarida amalga oshirgan loyihalari yuzasidan atroflicha maʼlumot berdi.
O‘z navbatida, Qoraqalpog‘istonning mutasaddi rahbarlari ispan kompaniyasining texnologiyalariga katta qiziqish bildirib, hududda suvsizlik va sho‘rlanish oqibatida vujudga kelgan og‘ir vaziyat tufayli bu kabi texnologiyalar yordamida qo‘shma loyihalar ishlab chiqish taklifini bergan.
“Erishilgan dastlabki kelishuvlarga asosan, O‘zbekistonda qishloq xo‘jaligi va yetib borish qiyin bo‘lgan aholi punktlarini toza ichimlik suvi bilan taʼminlash bo‘yicha pilot loyihalarni ishlab chiqish rejalashtirildi”, — deyiladi xabarda.
Shu maqsadda Ispaniya kompaniyasi mutaxassislarini yaqin muddatlarda Qoraqalpog‘istonga tashrifini amalga oshirishi va keyinchalik Qoraqalpog‘iston Respublikasi rahbarlari boshchiligidagi delegatsiyaning Ispaniyaga tashrifini amalga oshirishga kelishilgan.
O‘zbekistonda suvni tejaydigan texnologiyalar
Aprel boshlarida “Suv resurslaridan foydalanish samaradorligini oshirish bo‘yicha kechiktirib bo‘lmaydigan chora-tadbirlar to‘g‘risida”gi prezident qarori qabul qilingandi.
Qarorga ko‘ra, 2023-yil 1-apreldan qishloq xo‘jaligi mahsulotlarini yetishtirishda suvni tejaydigan texnologiyalar joriy etishni davlat tomonidan qo‘llab-quvvatlashning quyidagi tartibi belgilanadi:
- tijorat banklari kreditlarining garov taʼminoti 50 foizgacha, biroq 2,5 milliard so‘mdan ortiq bo‘lmagan miqdorda Tadbirkorlik faoliyatini qo‘llab-quvvatlash davlat jamg‘armasi kafilligi asosida taʼminlanadi;
- tijorat banklarining milliy valyutada ajratiladigan, foiz stavkasi Markaziy bank asosiy stavkasining 1,5 baravaridan oshmagan kreditlari bo‘yicha foiz stavkasining asosiy stavkadan oshgan, biroq asosiy stavkaning 30 foizidan ko‘p bo‘lmagan qismini qoplash uchun Jamg‘arma hisobidan kompensatsiya taqdim etiladi.
Izoh (0)