Toshkent shahrining Yashnobod tumanida sodir bo‘lgan yo‘l-transport hodisasi oqibatida bir ayol jarohat oldi. Bu haqda poytaxt IIBB YHXB axborot xizmati xabar berdi.
Ma’lum qilinishicha, 13-aprel kuni soat 10:50 larda Yashnobod tumani Mahtumquli ko‘chasida 21 yoshli R.I. boshqaruvida bo‘lgan Lacetti rusumli avtomashinasida tartibga solinmagan piyodalar o‘tish joyidan yo‘lni kesib o‘tayotgan piyoda — 47 yoshli U.E. ni urib yuborishi oqibatida yo‘l-transport hodisasi sodir bo‘lgan.
YTH natijasida piyoda tan jarohati olib shifoxonaga yotqizilgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilgan. Hozirda tergov davom etmoqda.
Bloger Nikita Makarenko mazkur holat yuzasidan o‘z fikrini bildirib, yo‘l-transport hodisasida Toshkent shahar rahbariyati va respublika YHXXni aybladi. “Aftidan, ular shu orqali Toshkent aholisi sonini kamaytirishni o‘ylagan ko‘rinadi”, — deb yozadi u.
Piyodalar bilan bog‘liq avariyalar
Toshkent viloyatida “Jiguli” yo‘l chetidagi ikki kishini urib yuborgani va piyodalar vafot etgani to‘g‘risida xabar berilgandi. Shuningdek, Farg‘ona viloyatida ham 2 piyoda o‘limi bilan bog‘liq yo‘l-transport hodisalari sodir bo‘lgan edi. Aprel o‘rtalarida esa Toshkent shahar Bektemir tumanida sodir bo‘lgan yo‘l-transport hodisasi oqibatida bir kishi halok bo‘lgan.
Izoh (0)