Тошкент шаҳрининг Яшнобод туманида содир бўлган йўл-транспорт ҳодисаси оқибатида бир аёл жароҳат олди. Бу ҳақда пойтахт ИИББ ЙҲХБ ахборот хизмати хабар берди.

Маълум қилинишича, 13 апрель куни соат 10:50 ларда Яшнобод тумани Маҳтумқули кўчасида 21 ёшли Р.И. бошқарувида бўлган Lacetti русумли автомашинасида тартибга солинмаган пиёдалар ўтиш жойидан йўлни кесиб ўтаётган пиёда — 47 ёшли У.Э. ни уриб юбориши оқибатида йўл-транспорт ҳодисаси содир бўлган.
ЙТҲ натижасида пиёда тан жароҳати олиб шифохонага ётқизилган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилган. Ҳозирда тергов давом этмоқда.

Блогер Никита Макаренко мазкур ҳолат юзасидан ўз фикрини билдириб, йўл-транспорт ҳодисасида Тошкент шаҳар раҳбарияти ва республика ЙҲХХни айблади. “Афтидан, улар шу орқали Тошкент аҳолиси сонини камайтиришни ўйлаган кўринади”, — деб ёзади у.
Пиёдалар билан боғлиқ авариялар
Тошкент вилоятида “Жигули” йўл четидаги икки кишини уриб юборгани ва пиёдалар вафот этгани тўғрисида хабар берилганди. Шунингдек, Фарғона вилоятида ҳам 2 пиёда ўлими билан боғлиқ йўл-транспорт ҳодисалари содир бўлган эди. Апрель ўрталарида эса Тошкент шаҳар Бектемир туманида содир бўлган йўл-транспорт ҳодисаси оқибатида бир киши ҳалок бўлган.
Изоҳ (0)