O‘zbekiston va Xitoy o‘rtasida biotexnologiya sohasini rivojlantirishga qaratilgan 40 million dollar qiymatidagi memorandum imzolandi. Bu haqda Oliy taʼlim, fan va innovatsiyalar vazirligi axborot xizmati xabar berdi.
Xabarga ko‘ra, 28-aprel kuni II Toshkent xalqaro investitsiya forumi doirasida Oliy taʼlim, fan va innovatsiyalar vazirligi hamda Guangzhou Youdi Biotechnology Co., Ltd. kompaniyasi o‘rtasida o‘zaro hamkorlik memorandumi imzolandi. Tomonlar ilmiy-texnikaviy va innovatsion hamkorlik, ilm-fan, texnologiyalar va innovatsiyalarni rivojlantirish borasida o‘zaro anglashuvga erishdi.
Memorandum ikki bosqichdan iborat bo‘lib, birinchi bosqichda tayyor uchastkada biotexnologik mahsulotlarni ishlab chiqarish yo‘lga qo‘yiladi, ikkinchi bosqichda esa laboratoriyalar uchun reaktivlar va asbob-uskunalar ishlab chiqaruvchi zavod qurilishi ko‘zda tutilmoqda. Shuningdek, hamkorlik doirasida biotexnologiya sohasida tadqiqot ishlari olib boriladi, innovatsiyalar va texnologiyalar almashinuvi amalga oshiriladi, ilmiy va amaliy konferensiyalar, forumlar, seminarlar, ko‘rgazmalar, tanlovlar tashkil etiladi.
O‘zbekiston tomondan hujjatni oliy taʼlim, fan va innovatsiyalar vaziri Ibrohim Abdurahmonov, Xitoy tomondan Guangzhou Youdi Biotechnology Co kompaniyasi rahbari Li Laiqing imzoladi. Memorandum doirasida 2027-yilga qadar Xitoy tomonidan birgalikda faoliyatni amalga oshirish uchun 40 million dollar miqdorida investitsiya kiritiladi.
Izoh (0)