Sirdaryo viloyatida 500 million dollarlik O‘zbekiston–Xitoy biotexnologiyalar klasteri quriladi. Bu haqda viloyat hokimligi axborot xizmati xabar berdi.
Xabarga ko‘ra, bu nafaqat Markaziy Osiyo, balki MDH va Kavkazoldi davlatlari uchun yagona bo‘lib xizmat qiladi. Xitoy biotexnologiya sohasi rivoji bo‘yicha so‘nggi besh yilda AQSHdan keyin dunyoda ikkinchi o‘rinda.
Klaster sohaga milliy kadrlar tayyorlash va ilmiy tadqiqot bilan shug‘ullanishga mo‘ljallangan O‘zbek-Sino biotexnologiya universiteti (Uzbek-Sino Biotechnology University), kasalliklarni davolashda eng so‘nggi diagnostika davolash usullari qo‘llanadigan Innovatsion tibbiyot klinikasi, Markaziy Osiyo aholisi, hududdagi hayvonlar va o‘simliklar genomini o‘rganishga ixtisoslashgan Markaziy Osiyo genom markazi, biomateriallar va genetik maʼlumotlarni saqlovchi Genbank va data markazi, o‘simta va saraton kasalliklarini davolovchi Hujayra terapiyasi markazini o‘z ichiga oladi.
Bundan tashqari, hududda laboratoriyalar uchun diagnostika uskunalari va maxsus to‘plamlarini ishlab chiqaruvchi korxona, innovatsion vaksinalar ishlab chiqaruvchi markaz barpo etiladi. Alohida korxonalarda probiotik biopreparatlar, monoklonal antitanachalar va boshqa rekombinant preparatlar ishlab chiqariladi. Yangi tug‘ilgan chaqaloqlar va homilador ayollardagi genetik muammolarni aniqlash uchun diagnostika markazi tashkil etiladi. Shuningdek, 10 ming talaba uchun o‘quv binolari, zamonaviy kampus, laboratoriyalar, muhandislar maktabi ochiladi.
Izoh (0)