Tashqi mehnat migratsiyasi Rossiyaga ishlash uchun ketayotgan o‘zbekistonliklar soni oshganini rad etdi

Bandlik va mehnat munosabatlari vazirligi huzuridagi Tashqi mehnat migratsiyasi agentligi Rossiyada o‘zbekistonlik mehnat muhojirlari soni oshgani haqidagi xabarga munosabat bildirdi.

Rossiya iqtisodiy rivojlanish vaziri Maksim Reshetnikov yetti yil ichida O‘zbekistondan Rossiyaga ishlash uchun kelayotgan fuqarolar soni to‘rt baravar ko‘payganini aytgandi.

Tashqi mehnat migratsiyasi agentligi axborotida taʼkidlanishicha, mehnat migratsiyasi, ayniqsa Rossiya Federatsiyasiga ishlash maqsadida boruvchilar oqimi ish mavsumiga ko‘ra tez o‘zgaruvchan hisoblanadi.

“O‘zbekistonlik mehnat migrantlarining asosiy qismi Rossiya Federatsiyasi hissasiga to‘g‘ri kelsa-da, ammo xabarlarda taʼkidlanayotgandek so‘nggi 7 yilda ushbu davlatga ketayotgan yurtdoshlarimiz soni 4 barobar oshmagan. Agar raqamlarga murojaat qilinsa, Rossiya Federatsiyasida vaqtincha mehnat faoliyatini olib borayotgan o‘zbekistonlik migrantlar soni 2016-yilda taxminan 2 million nafar bo‘lgan bo‘lsa, hozirgi vaqtda bu 1,5 million nafarga yaqinni tashkil etadi”, — deyiladi xabarda.

Agentlik so‘nggi yillarda mehnat migratsiyasi geografiyasini kengaytirish, xususan, xorijda ishlash istagidagi fuqarolarni dunyoning rivojlangan davlatlariga manzilli ishlarga jalb qilish bo‘yicha qator natijalarga erishilganini ham qayd etib o‘tgan. Jumladan, Janubiy Koreya, Yaponiya, Turkiya, Germaniya, Buyuk Britaniya va Yevropaning boshqa mamlakatlarida qurilish, ishlab chiqarish, tibbiyot va xizmat ko‘rsatish sohalarining turli yo‘nalishlarida ishchilarga talab yuqori.

Tashqi mehnat migratsiyasi agentligi 33 ta davlatning 500 ga yaqin ish beruvchi tashkilotlari bilan kelishuvlar imzolagan.