Ўзбекистон ва Хитой ўртасида биотехнология соҳасини ривожлантиришга қаратилган 40 миллион доллар қийматидаги меморандум имзоланди. Бу ҳақда Олий таълим, фан ва инновациялар вазирлиги ахборот хизмати хабар берди.
Хабарга кўра, 28 апрель куни II Тошкент халқаро инвестиция форуми доирасида Олий таълим, фан ва инновациялар вазирлиги ҳамда Guangzhou Youdi Biotechnology Co., Ltd. компанияси ўртасида ўзаро ҳамкорлик меморандуми имзоланди. Томонлар илмий-техникавий ва инновацион ҳамкорлик, илм-фан, технологиялар ва инновацияларни ривожлантириш борасида ўзаро англашувга эришди.
Меморандум икки босқичдан иборат бўлиб, биринчи босқичда тайёр участкада биотехнологик маҳсулотларни ишлаб чиқариш йўлга қўйилади, иккинчи босқичда эса лабораториялар учун реактивлар ва асбоб-ускуналар ишлаб чиқарувчи завод қурилиши кўзда тутилмоқда. Шунингдек, ҳамкорлик доирасида биотехнология соҳасида тадқиқот ишлари олиб борилади, инновациялар ва технологиялар алмашинуви амалга оширилади, илмий ва амалий конференциялар, форумлар, семинарлар, кўргазмалар, танловлар ташкил этилади.
Ўзбекистон томондан ҳужжатни олий таълим, фан ва инновациялар вазири Иброҳим Абдураҳмонов, Хитой томондан Guangzhou Youdi Biotechnology Co. компанияси раҳбари Ли Лаиқинг имзолади. Меморандум доирасида 2027 йилга қадар Хитой томонидан биргаликда фаолиятни амалга ошириш учун 40 миллион доллар миқдорида инвестиция киритилади.
Изоҳ (0)