O‘zbekistonda 30-aprel kuni soat 8:00 dan 10 ming 758 uchastkada Konstitutsiyaning yangi tahriri bo‘yicha referendum boshlandi. Shuningdek, O‘zbekistonning 39 ta xorijiy davlatlardagi diplomatik va boshqa vakolatxonalari huzurida tuzilgan 55 ta referendum o‘tkazuvchi uchastkalari, jumladan, Sharq mamlakatlarida tashkil etilgan referendum uchastkalari ish boshladi.
Markaziy saylov komissiyasi raisi Zayniddin Nizomxo‘jayevning ma’lum qilishicha, ayni paytda referendum o‘tkazuvchi barcha okruglar va uchastkalar o‘rtasida doimiy aloqa o‘rnatilgan. Referendum boshlanganidan bir soat davomida Markaziy saylov komissiyasiga referendumga doir qonunchilik buzilgani haqida ma’lumotlar kelib tushmadi.
Agarda referendumda ovoz beruvchi fuqarolar, kuzatuvchilar yoki ommaviy axborot vositalari vakillari referendum qonunchiligi buzilishi holatlarini aniqlagudek bo‘lsalar, ular sud, prokuratura organlari yoki referendum komissiyalariga murojaat qilishi mumkin.
2023-yilgi referendumda ovoz berish jarayonlarini referendum uchastkasida o‘rnatilgan videokameralar orqali amalga oshirilayotgan video-translyatsiyadan real vaqt rejimida (onlayn) kuzatib borish imkoniyati yaratilgan. Markaziy saylov komissiyasining Matbuot markazidagi ekranlarda, saylov.uz rasmiy veb-saytida hamda O‘zbekiston Milliy teleradiokompaniyasining “O‘zbekiston 24” va boshqa telekanallar orqali ham ovoz berish jarayonini uzluksiz kuzatish mumkin.
“O‘zbekiston Respublikasi fuqarolarini referendumda ishtirok etishga yoki ishtirok etmaslikka majbur qilish maqsadida ularga, shuningdek xohish-irodasini erkin bildirishiga ta’sir ko‘rsatishga hech kim haqli emas. Har bir fuqaro bir ovozga ega. Fuqarolarning o‘z xohish-irodasini bildirishi nazorat qilinishiga yo‘l qo‘yilmaydi”, — deydi Zayniddin Nizomxo‘jayev.
Referendumni jami 383 nafar xalqaro kuzatuvchi, jumladan 14 ta nufuzli xalqaro tashkilotdan 184 nafar, 45 ta davlatdan 199 nafar xalqaro kuzatuvchilar bevosita kuzatib bormoqda. Bundan tashqari, siyosiy partiyalar va fuqarolarning o‘zini o‘zi boshqarish organlaridan jami 43 mingdan ortiq mahalliy kuzatuvchilar bevosita kuzatuvda ishtirok etmoqda.
Saylovchilar yagona elektron ro‘yxatiga 19 million 722 ming 809 nafar ovoz beruvchi fuqaro kiritilgan. Xorijiy davlatlarda tuzilgan 55 ta referendum uchastkasidagi ovoz beruvchilar ro‘yxatiga jami 307 ming 895 nafar fuqaro kiritilgan.
19—26-aprel kunlari bo‘lib o‘tgan muddatidan oldin referendumda O‘zbekistonning 611 320 nafar fuqarosi ovoz berdi.
Izoh (0)