Turkiya muxolifati yetakchisi, Turkiya prezidenti Rajab Toyyib Erdo‘g‘onning asosiy raqibi Kamol Qilichdaro‘g‘li mamlakatning Rossiya bilan munosabatlari haqida gapirdi. Bu haqda Financial Times xabar berdi.
Turkiya prezidentligiga nomzod Kamol Qilichdaro‘g‘li, agar u saylovda g‘alaba qozonsa, “Vladimir Putinning Ukrainaga hujum qilib, bosib olishini to‘g‘ri deb hisoblamasa ham” Rossiya bilan iqtisodiy aloqalarini saqlab qolishini aytdi.
Siyosatchi Yevropa Ittifoqiga qo‘shilish bo‘yicha muzokaralarni zudlik bilan qayta boshlashni xohlashini, mamlakatni avtokratiyaga aylantirmaslik uchun Turkiyada demokratik institutlarni tiklashni rejalashtirayotganini aytdi.
“Sud tizimi mustaqilligi, matbuot va so’z erkinligi – bularning barchasi qaytishi kerak”, — dedi Qilichdaro‘g‘li va Anqara Erdo‘g‘on bilan lider sifatida “vaqtni behuda o’tkaza olmasligini” qo’shimcha qildi.
Avvalroq Turkiya prezidenti Rajab Toyyib Erdo‘g‘on kasallik haqidagi xabarlardan so‘ng barcha ommaviy tadbirlarni bekor qilgandi. 26-aprel kuni Erdo‘g‘on jonli efirda o‘zini yomon his qilgan, shu sababli intervyu uzilib qolgan.
OAV Turkiya rahbari oshqozon shamollashi tufayli kasal bo‘lganini yozgan. Bir necha daqiqalik tanaffusdan so‘ng Erdo‘g‘on studiyaga qaytib, tig‘iz jadval asosida ishlayotganini tushuntirgan.
Keyinroq ijtimoiy tarmoqlarda Turkiya prezidenti infarktni boshidan o‘tkazgani, ahvoli og‘irligi haqida tasdiqlanmagan xabarlar tarqalgan. Dezinformatsiyaga qarshi kurash markazi Erdo‘g‘onning infarktga uchragani va shifoxonaga yotqizilgani haqidagi xabarlarni rad etgan.
27-aprel kuni Erdo‘g‘on “Oqquyu” atom elektr stansiyasining ochilish marosimida onlayn formatda ishtirok etgan.
Izoh (0)