Туркия мухолифати етакчиси, Туркия президенти Ражаб Тоййиб Эрдўғоннинг асосий рақиби Камол Қиличдарўғли мамлакатнинг Россия билан муносабатлари ҳақида гапирди. Бу ҳақда Financial Times хабар берди.
Туркия президентлигига номзод Камол Қиличдарўғли, агар у сайловда ғалаба қозонса, “Владимир Путиннинг Украинага ҳужум қилиб, босиб олишини тўғри деб ҳисобламаса ҳам” Россия билан иқтисодий алоқаларини сақлаб қолишини айтди.
Сиёсатчи Европа Иттифоқига қўшилиш бўйича музокараларни зудлик билан қайта бошлашни хоҳлашини, мамлакатни автократияга айлантирмаслик учун Туркияда демократик институтларни тиклашни режалаштираётганини айтди.
“Суд тизими мустақиллиги, матбуот ва сўз эркинлиги – буларнинг барчаси қайтиши керак”, — деди Қиличдарўғли ва Анқара Эрдўғон билан лидер сифатида “вақтни беҳуда ўтказа олмаслигини” қўшимча қилди.
Аввалроқ Туркия президенти Ражаб Тоййиб Эрдўғон касаллик ҳақидаги хабарлардан сўнг барча оммавий тадбирларни бекор қилганди. 26 апрель куни Эрдўғон жонли эфирда ўзини ёмон ҳис қилган, шу сабабли интервью узилиб қолган.
ОАВ Туркия раҳбари ошқозон шамоллаши туфайли касал бўлганини ёзган. Бир неча дақиқалик танаффусдан сўнг Эрдўғон студияга қайтиб, тиғиз жадвал асосида ишлаётганини тушунтирган.
Кейинроқ ижтимоий тармоқларда Туркия президенти инфарктни бошидан ўтказгани, аҳволи оғирлиги ҳақида тасдиқланмаган хабарлар тарқалган. Дезинформацияга қарши кураш маркази Эрдўғоннинг инфарктга учрагани ва шифохонага ётқизилгани ҳақидаги хабарларни рад этган.
27 апрель куни Эрдўғон “Оққую” атом электр станциясининг очилиш маросимида онлайн форматда иштирок этган.
Изоҳ (0)