Turkiya prezidenti Rajab Toyyib Erdo‘g‘on ma’muriyatining aloqa bo‘limi qoshida tashkil etilgan Dezinformatsiyaga qarshi kurash markazi davlat rahbarining infarktga uchragani va shifoxonaga yotqizilgani haqidagi xabarlarni rad etdi.
Shuningdek, Turkiya vitse-prezidenti Fuat O‘qtay Erdo‘g‘onning ahvoli “juda yaxshi” ekanini aytdi.
“Prezidentimizning ahvoli juda yaxshi. Doimiy aloqadamiz. Bir oz shamollagan, xolos”, — deya taʼkidladi siyosatchi Anqara — Sivas shaharlararo tezyurar poyezd qatnovi yo‘lga qo‘yilishi munosabati bilan so‘zlagan nutqida.
Turkiya prezidenti ma’muriyati aloqa bo‘limi rahbari Faxriddin Altun Erdo‘g‘an 27-aprel kuni bo‘lib o‘tadigan “Oqquyu” atom elektr stansiyasining ochilish marosimida onlayn formatda ishtirok etishini ma’lum qildi.
Turkiyada Erdo‘g‘on jamoasi prezidentning barcha saylovoldi chiqishlari va ommaviy tadbirlarini 3-mayga qadar bekor qilgan edi. Mamlakatda 14-may kuni prezidentlik saylovlari bo‘lib o‘tadi.
Erdo‘g‘onning sog‘lig‘i yomonlashdi
25-aprel kuni saylov kampaniyasi doirasida Erdo‘g‘on televideniyeda jonli efirga chiqib, savollarga javob berayotgan paytida uning salomatligi yomonlashdi. Shu sabablii jonli efir uzib qo‘yildi. 20 daqiqadan so‘ng Erdo‘g‘on efirda ko‘rinish berib, tomoshabinlardan uzr so‘radi va saylovoldi ishlari davomida oshqozoni shamollab qolganini aytdi. Shundan keyin ijtimoiy tarmoqlarda siyosatchi miokard infarktini boshidan o‘tkazgani haqida tasdiqlanmagan xabar tarqalishni boshladi.
Izoh (0)