Turkiyada 27-mart kuni mahalliy vaqt bilan soat 20:00da prezidentlikka nomzodlar uchun imzo to‘plash jarayoni yakunlandi. Bu haqda TRT Haber xabar berdi.
Prezidentlikka nomzod bo‘lish uchun kamida 100 ming imzo to‘plash kerak edi. Bu ikki nomzod tomonidan amalga oshirilgan. Bundan avvalroq ikki nomzod – Rajab Toyyib Erdo‘g‘on va Kamol Qilichdaro‘g‘li nomzod sifatida rasman ro‘yxatga olingan, ular parlament fraksiyalari tomonidan ko‘rsatilgan va ularga imzo to‘plash kerak bo‘lmagan.
Shu tariqa, Turkiya prezidentligi uchun da’vogarlar ro‘yxatiga to‘rt kishi kirdi:
- mamlakatning amaldagi rahbari Rajab Toyyib Erdo‘g‘on;
- Olti muxolifatchi partiyasi alyansidan (Xalq alyansi) nomzod va Turkiya Xalq partiyasi raisi Kamol Qilichdaro‘g‘li;
- “Vatan” partiyasi raisi Muharram Inje (114,6 ming imzo to‘plagan);
- “Otaturkchilar ittifoqi”dan nomzod Sinan Ogan (111,5 ming imzo to‘plagan).
Turkiyada prezidentlik saylovlari
2022-yil avgust oyida Turkiyada prezidentlik saylovlari 2023-yil 18-iyunda bo‘lib o‘tishi xabar qilingandi, biroq 23-yanvar kuni Turkiyaning amaldagi prezidenti Rajab Toyyib Erdo‘g‘on mamlakatda saylovlar 14-mayga belgilanganini ma’lum qildi.
22-mart kuni Turkiyaning amaldagi prezidenti Rajab Toyyib Erdo‘g‘on mamlakatda bo‘lib o‘tadigan prezidentlik saylovlarida o‘z nomzodini qo‘yishini rasman e’lon qildi. Bir necha kundan keyin Kamol Qilichdaro‘g‘lining nomzodi rasman ro‘yxatga olindi.
Saylovning birinchi bosqichida g‘alaba qozonish uchun, davlat rahbari lavozimiga nomzod 50 foizdan ortiq ovoz to‘plashi kerak. Aks holda, ikkinchi bosqich bo‘lib o‘tadi, unda birinchisida eng ko‘p qo‘llab-quvvatlangan ikki nomzod ishtirok etadi. Avvalgi prezidentlik saylovlari 2018-yil 24-iyun kuni bo‘lib o‘tgandi. Ularda Erdo‘g‘on 52,6 foiz ovoz to‘plagan holda g‘alaba qozongan. Mart oyi boshida Erdo‘g‘on saylovchilarga muxolifat nomzodining g‘alabasi Turkiya uchun falokat bo‘lishini aytgan.
Izoh (0)