Toshkentda enagaga tashlab ketilgan 3 yashar qiz vafot etgani haqida xabar berilgan edi. Marhumaning onasi voqea haqida aytib berdi.
Ayolning so‘zlariga ko‘ra, 2019-yil sobiq turmush o‘rtog‘i bilan nikoh o‘qitib, yashay boshlagan. 2020-yil qiz farzandi tug‘ilgan. Oradan bir yil o‘tib ular ajrashgach, ayol ijarada yashay boshlagan. Shundan so‘ng qizini qarab turishi uchun sinfdoshiga topshirgan. 1-mart kuni qizchaning tug‘ilgan kuni bo‘lgan. Ayol uni ko‘rgani kelganida peshonasida g‘urra ko‘rgan.
“Bolam kichkina edi, sinfdoshim, yaʼni qizimning enagasi bilan yaxshi gaplashib yurib, sharoitimni tushuntirdim. Bolamga qarab berishini aytgan. Tug‘ilgan kuniga borganimda peshonasida g‘urra ko‘rdim va yuzlari shilingan edi. Hayitdan keyin 23-sanada telefon qildi, aniq esimda bor. Bolamni olib ketaman, sog‘indim, dedim. 25-da ertalab bolang o‘ldi, deb aytdi. Uyiga borsam bolam rostdan o‘lgan ekan. Ko‘rib bo‘lmaydigan darajada edi. Menga zinadan yiqilib tushdi, dedi. Quloqlari, bo‘yinlarigacha shilingan edi. Bir oyda 4 marotaba xabar olar edim. Enagadan qaytarib olish niyatim bo‘lgan, boshqa enaga ham qidirdim, yaqin sinfdoshim bo‘lgani uchun ishonchim bor edi”, — deydi u.
Enaganing qaynonasi qizcha 3 oydan buyon ularning uyida yashab kelganini aytgan.
“Kelinimning o‘rtog‘i bo‘lgan. Boshida ko‘p marotaba rad qilgan edim. Onasini shu kungacha ko‘rmaganman, kecha ko‘rdim. Gaplari bo‘yicha otasi uyidan haydab yuborgan. Ko‘chada yurib tug‘ib olgan. Uyim yo‘q, yordam ber, qizim menga ishlashga xalaqit beryapti, deb kelinimni olib qolishga undagan. Smenda bo‘lgan vaqtimda olib kelib tashlagan. Qizni ko‘rganimda birinchi o‘zim qo‘rqdim. Ko‘rinishidan kasalligi bilinib turar edi. Oyog‘i og‘ridi, shifoxonaga olib borib ko‘rsatdik, dori-darmon oldik, nabiramdek qarar edim. Sochi to‘kilaverardi, qoqilib-yiqilib yurar edi. Kelinim bechora unga hech qanday yomonligi yo‘q edi, o‘z bolasidek qaragan.
Ishdan kirib kelsam, kelinim qichqirayotgan ekan. Oshxonada tili ketib qolgan, sudurgi bergan. Kelinim shu bilan ovora ekan. Qo‘limga olib spirt hidlatdim, o‘shanda nafas olgandek bo‘ldi. Keyin yotqizib sunʼiy nafas berib, tez tibbiy yordam chaqirdik. Podvalga zinadan dumalab yiqilib tushgan ekan. Onasi birinchi kelganida hech qanday da’vom yo‘q dedi, keyin esa janjal bo‘lib ketdi”, — deydi ayol.
Mazkur holat yuzasidan Sergeli tumani IIO FMB tomonidan Jinoyat kodeksining 117-moddasi (xavf ostida qoldirish) bilan jinoyat ishi qo‘zg‘atilgan. Gumon qilinuvchi Sh.N. protsessual tartibda ushlangan. Tergov davom etmoqda.
Izoh (0)