“Tug‘ilib-o‘sgan qishlog‘im uchun ovoz berish imkoniyatimni cheklamang”. Savol mohiyatini tushunmagan vazir o‘rinbosari jurnalist savoliga yetarlicha javob berolmadi

Iqtisodiyot va moliya vaziri o‘rinbosari Anvar Karimov “Daryo” jurnalistining “Ochiq budjet”da ovoz berish jarayonini shaffoflashtirish taklifini ilgari surib, “ovoz berishda ovoz beruvchining hududni yaxshi bilish-bilmasligi ham inobatga olinishi kerak, masalan Toshkent shahrining Yunusobod yoki Chilonzor tumanida yashovchi aholi maʼlum bir haq evaziga Qashqadaryo viloyatining Mirishkor tumanidagi qaysidir mahalla yo‘lini taʼmirlash uchun ovoz berishi qay darajada adolatli? Ovoz yig‘ayotganlar ko‘rsatgan 2 dona rasm ovoz beruvchiga hududdagi ahvol haqida to‘liq tasavvurga ega bo‘lishi yetarli emas-ku”, deya bergan savoliga “Shaxsan men aslida sirdaryolikman, bugungi kunda Toshkent shahrida yashayotgan bo‘lsam-da, tug‘ilib o‘sgan qishlog‘im uchun ovoz berishim mumkin-ku, buni cheklamang”, — deya javob berdi.

Maʼlum bo‘lishicha, 28-aprel kuni Iqtisodiyot va moliya vazirligida “Ochiq budjet” axborot portali orqali eʼlon qilingan “Tashabbusli budjet” loyihasining 2023-yil birinchi mavsumida faol ishtirok etgan hokim yordamchilari va fuqarolarni taqdirlash marosimi bo‘lib o‘tgan.

Tadbirda so‘z olgan “Daryo” jurnalisti “Tashabbusli budjet” tashabbuskorlariga yuzlanib, “Ochiq budjet” loyihasida ovoz berish jarayonini shaffoflashtirish kerakligini aytib, “ovoz berish jarayonida ovoz beruvchining ovoz berayotgan loyihasini qay darajada bilish-bilmasligi, hududdagi vaziyatni tasavvur qila olish imkoniyati ham hisobga olinishi kerak. Masalan Qashqadaryo viloyatining Mirishkor tumanida yashovchi ovoz yig‘uvchi Toshkent shahriga kelib odamlardan ovoz to‘playotganda Yunusobod yoki Chilonzor tumanida yashovchi odamga 2 dona rasm ko‘rsatib, mahallasidagi yo‘lning abgorligini aytadi va maʼlum haq evaziga ovoz berishga chorlaydi. Aytaylik ovoz yig‘uvchi uddaburonligi, imkoniyati borligi sabab shu mahalla yo‘li boshqa bir mahalla yo‘liga nisbatan yaxshi bo‘lsa-da, Toshkentga kelib hududni bilmaydigan odamdan o‘sha hudud taʼmirlanishini so‘rab, yuqoriga taklif olyapti. Holbuki, Toshkentda yashagan, Qashqadaryoga borib ko‘rmagan ovoz beruvchi hudud haqida hatto tasavvurga ham ega emas. Shuningdek, ovoz to‘plovchi ko‘rsatgan 2 dona rasm hudud ahvoli haqida yetarlicha tasavvur olishga imkon bermaydi. Tashabbuskorlar mana shunaqa vaziyatda shaffoflikni taʼminlash uchun nimadir qilyaptimi?”, — deya savol berdi.

Mazkur savolga javob bergan vazir o‘rinbosari savol mohiyatini uncha tushunmadi chog‘i “Men asli sirdaryolikman, Toshkentda yashasam ham tug‘ilib-o‘sgan qishlog‘im uchun ovoz berish imkoniyatimni cheklamang”, — deya javob berdi. Vaholanki, nashr jurnalistining savolida ovoz berayotgan kishining ovoz berayotgan hududini bilish-bilmasligi, o‘sha hudud haqida tasavvurga ega bo‘lish imkoniyati hisobga olinishi kerak deyilgan. Vazir o‘rinbosarining jurnalist savoliga javobi qoniqarsiz bo‘ldi.