O‘zbekistonda faoliyat olib borayotgan nodavlat taʼlim tashkilotlari ham 2023-yildan boshlab baholash reytingida ishtirok etishi mumkin. Bu haqda Maktabgacha va maktab ta’limi vazirligi xabar berdi.
Hukumatning tegishli qarori asosida o‘quvchilarning fan bo‘yicha egallagan bilimlari bilan bir qatorda o‘quvchilarning hayotga tayyorgarlik darajasi (bilim darajasi, oliygohlarga kirish ko‘rsatkichi, xorijiy tilni bilish darajasi), pedagoglarning sifat tarkibi va salohiyati (oliy va birinchi toifaga ega pedagoglar ulushi), maktablardagi maʼnaviy-maʼrifiy va o‘quv-tarbiyaviy muhit hamda mahalliy hokimliklarning maktablar rivoji uchun qo‘shgan hissasini inobatga olgan holda tuman (shahar)lar hamda Qoraqalpog‘iston Respublikasi, viloyatlar va Toshkent shahar kesimida umumtaʼlim muassasalarining reytingi tuzib kelinmoqda.
Ushbu jarayonda qurʼa tashlash yo‘li bilan tanlab olingan 10 foiz maktablardagi 9-sinf o‘quvchilarining bilimlari baholanadi, o‘qituvchilar o‘rtasida xalqaro TALIS baholash dasturi metodikasi asosida ijtimoiy so‘rovnoma o‘tkaziladi.
2023-yilda mazkur jarayonlarga yangilik kiritish maqsadida O‘zbekistonda faoliyat olib borayotgan nodavlat taʼlim tashkilotlari faoliyatini ham baholash nazarda tutilmoqda.
Shu munosabat bilan milliy reytingda ishtirok etish istagini bildirgan nodavlat taʼlim tashkilotlari quyidagi havola orqali ro‘yxatdan o‘tishlarini mumkin.
Maktablarning milliy reytingi
2020-yilda Ta’lim sifatini nazorat qilish davlat inspeksiyasi umumta’lim maktablarining milliy reytingini e’lon qilgandi. Unga ko‘ra, Buxoro, Namangan va Xorazm viloyati maktablari eng yuqori ko‘rsatkichga erishgan, Sirdaryo, Toshkent va Surxondaryo viloyati maktablari esa eng past natija ko‘rsatgan. 2021-yilda esa eng yuqori o‘rinlarni Buxoro, Navoiy va Xorazm viloyatlari egallagan bo‘lsa, eng oxirgi o‘rinlarni Surxondaryo, Qashqadaryo va Toshkent viloyatlari band etgandi.
Izoh (0)