O‘zbekiston prezidentining 2021-yildagi “Yoshlarni har tomonlama qo‘llab-quvvatlash va ularning ijtimoiy faolligini yanada oshirishga oid qo‘shimcha chora-tadbirlar to‘g‘risida”gi farmoni bilan xorijdagi nufuzli oliy ta’lim muassasalarida ta’lim olayotgan, ilm-fan bilan shug‘ullanayotgan, yetakchi kompaniyalarda ishlayotgan hamda yuksak bilim va malakaga ega bo‘lgan O‘zbekiston yoshlarining vatanga kelib ishlashi uchun zarur shart-sharoit yaratish, ularga uy-joy ajratish, munosib maosh to‘lash bo‘yicha yangi tizim joriy etilmoqda. Bu haqda prezident huzuridagi Davlat xizmatini rivojlantirish agentligi xabar berdi.
Farmonga ko‘ra, davlat organlari, tashkilot va muassasalarida faoliyat ko‘rsatayotgan nufuzli xalqaro reyting tashkilotlarining yuqori 500 talik ro‘yxatiga kiritilgan xorijiy oliy ta’lim muassasalarini (bakalavriat, magistratura) tamomlagan yoki ularda ilmiy daraja (PhD va unga tenglashtirilgan boshqa ilmiy daraja) olgan yosh mutaxassislarning lavozim maoshiga davlat budjeti mablag‘lari hisobidan qo‘shimcha ustamalar to‘lab borish tartibi joriy etilgan.
Qayd etilgan qo‘shimcha ustamalar Davlat xizmatini rivojlantirish agentligi, yosh mutaxassis va uning ish beruvchisi o‘rtasida imzolangan shartnoma asosida har oy to‘lab boriladi. Shartnoma 3 yilgacha bo‘lgan muddatga tuziladi va to‘lovlar ish beruvchi tomonidan amalga oshiriladi.
Davlat xizmatini rivojlantirish agentligi tomonidan shakllantirilgan oylik ustamalar tatbiq etiladigan ta’lim yo‘nalishlari, tor mutaxassisliklar ro‘yxati, davlat organlari, tashkilot va muassasalari ro‘yxati agentlikning rasmiy veb-sayti — “Argos.uz”ga joylashtirilgan.
Ma’lumot uchun, xalqaro e’tirof etilgan reyting beruvchi tashkilotlar – Quacquarelli Symonds World University Rankings, Times Nigher Education, Academic Ranking of World University hisoblanadi.
Xalqaro e’tirof etilgan reyting beruvchi tashkilotlar reytinglarida e’lon qilingan universitetlar ro‘yxati bilan Ta’lim sifatini nazorat qilish davlat inspeksiyasining rasmiy veb-sayti — “Tdi.uz”da tanishish mumkin.
Farmonga ko‘ra, Xalqaro reytingda 1 dan 100-o‘ringacha bo‘lgan xorijiy oliy ta’lim muassasalarini bakalavriat bosqichini tamomlagan yosh mutaxassislarning lavozim maoshlariga BHMning 30 barobari miqdorida, magistratura bosqichini tamomlagan yosh mutaxassislarning lavozim maoshlariga BHMning 40 barobari miqdorida, xorijiy oliy ta’lim muassasalarida ilmiy daraja (PhD va unga tenglashtirilgan boshqa ilmiy daraja) olgan yosh mutaxassislarning lavozim maoshiga BHMning 75 barobari miqdorida ustamalar belgilangan.
Xalqaro reytingda 101 dan 300-o‘ringacha bo‘lgan xorijiy oliy ta’lim muassasalarini bakalavriat bosqichini tamomlagan yosh mutaxassislarning lavozim maoshlariga BHMning 20 barobari miqdorida, magistratura bosqichini tamomlagan yosh mutaxassislarning lavozim maoshlariga BHMning 30 barobari miqdorida, xorijiy oliy ta’lim muassasalarida ilmiy daraja (PhD va unga tenglashtirilgan boshqa ilmiy daraja) olgan yosh mutaxassislarning lavozim maoshiga BHMning 60 barobari miqdorida ustamalar belgilangan.
Shuningdek, xalqaro reytingda 301 dan 500-o‘ringacha bo‘lgan xorijiy oliy ta’lim muassasalarini bakalavriat bosqichini tamomlagan yosh mutaxassislarning lavozim maoshlariga BHMning 15 barobari miqdorida, magistratura bosqichini tamomlagan yosh mutaxassislarning lavozim maoshlariga BHMning 20 barobari miqdorida, xorijiy oliy ta’lim muassasalarida ilmiy daraja (PhD va unga tenglashtirilgan boshqa ilmiy daraja) olgan yosh mutaxassislarning lavozim maoshiga BHMning 50 barobari miqdorida ustamalar belgilangan.
Misol uchun, Xitoyning Fudan universiteti QS reytingida 31-o‘rinda turadi. Mazkur universitetning doktoranturasini bitirgan yosh mutaxassisga BHMning 75 barobari imqdorida, ya’ni 20,25 million so‘m ustama to‘lanmoqda. Bundan tashqari, Buyuk Britaniyaning Dandi universiteti (University of Dundee) Tayms reytingida) 201-o‘rinda turadi. Mazkur universitetning magistratura bosqichini bitirgan yosh mutaxassisga BHMning 30 barobari miqdorida, ya’ni 8,1 million so‘m ustama to‘lanmoqda.
Farmonda qo‘shimcha ustamalar xalqaro e’tirof etilgan reyting beruvchi tashkilotlarning TOP 500 talik ro‘yxatiga kiritilgan xorijiy oliy ta’lim muassasalarini 2021-yil va kelgusi yillarda tamomlagan yosh mutaxassisga, ya’ni O‘zbekistonning “Yoshlarga oid davlat siyosati to‘g‘risida”gi qonuniga asosan, yosh mutaxassis — oliy yoki o‘rta maxsus, kasb-hunar ta’limi muassasasini bitirgan, ta’lim muassasasini bitirganidan so‘ng olgan ixtisosligi bo‘yicha uch yil ichida ishga kirgan va ma’lumoti to‘g‘risidagi hujjatda ko‘rsatilgan ixtisosligi bo‘yicha ishlayotganiga uch yildan ko‘p bo‘lmagan o‘ttiz yoshdan oshmagan xodimga nisbatan tatbiq etilishi belgilangan.
Bugungi kunda agentlik tomonidan 21 nafar yosh mutaxassislar bilan ustamalar to‘lash yuzasidan shartnomalar tuzilgan.
Avvalroq O‘zbekistondagi 4 ta OTM Buyuk Britaniyaning yosh universitetlar reytingidan o‘rin olgani to‘g‘risida xabar berilgandi.
Eslatib o‘tamiz, 2020-yilda O‘zbekistonning to‘rtta universiteti Sharqiy Yevropa va Markaziy Osiyoning eng yaxshi oliygohlari qatoriga kirgan, 2021-yilning sentabrida esa O‘zbekistondagi 10 ta OTM dunyoning yetakchi universitetlari reytingiga kirish uchun nomzod sifatida tanlab olingan edi.
Izoh (0)