Ўзбекистонда фаолият олиб бораётган нодавлат таълим ташкилотлари ҳам 2023 йилдан бошлаб баҳолаш рейтингида иштирок этиши мумкин. Бу ҳақда Мактабгача ва мактаб таълими вазирлиги хабар берди.
Ҳукуматнинг тегишли қарори асосида ўқувчиларнинг фан бўйича эгаллаган билимлари билан бир қаторда ўқувчиларнинг ҳаётга тайёргарлик даражаси (билим даражаси, олийгоҳларга кириш кўрсаткичи, хорижий тилни билиш даражаси), педагогларнинг сифат таркиби ва салоҳияти (олий ва биринчи тоифага эга педагоглар улуши), мактаблардаги маънавий-маърифий ва ўқув-тарбиявий муҳит ҳамда маҳаллий ҳокимликларнинг мактаблар ривожи учун қўшган ҳиссасини инобатга олган ҳолда туман (шаҳар)лар ҳамда Қорақалпоғистон Республикаси, вилоятлар ва Тошкент шаҳар кесимида умумтаълим муассасаларининг рейтинги тузиб келинмоқда.
Ушбу жараёнда қуръа ташлаш йўли билан танлаб олинган 10 фоиз мактаблардаги 9-синф ўқувчиларининг билимлари баҳоланади, ўқитувчилар ўртасида халқаро TALIS баҳолаш дастури методикаси асосида ижтимоий сўровнома ўтказилади.
2023 йилда мазкур жараёнларга янгилик киритиш мақсадида Ўзбекистонда фаолият олиб бораётган нодавлат таълим ташкилотлари фаолиятини ҳам баҳолаш назарда тутилмоқда.
Шу муносабат билан миллий рейтингда иштирок этиш истагини билдирган нодавлат таълим ташкилотлари қуйидаги ҳавола орқали рўйхатдан ўтишларини мумкин.
Мактабларнинг миллий рейтинги
2020 йилда Таълим сифатини назорат қилиш давлат инспекцияси умумтаълим мактабларининг миллий рейтингини эълон қилганди. Унга кўра, Бухоро, Наманган ва Хоразм вилояти мактаблари энг юқори кўрсаткичга эришган, Сирдарё, Тошкент ва Сурхондарё вилояти мактаблари эса энг паст натижа кўрсатган. 2021 йилда эса энг юқори ўринларни Бухоро, Навоий ва Хоразм вилоятлари эгаллаган бўлса, энг охирги ўринларни Сурхондарё, Қашқадарё ва Тошкент вилоятлари банд этганди.
Изоҳ (0)