Туркия президенти Ражаб Тоййиб Эрдўғон маъмуриятининг алоқа бўлими қошида ташкил этилган Дезинформацияга қарши кураш маркази давлат раҳбарининг инфарктга учрагани ва шифохонага ётқизилгани ҳақидаги хабарларни рад этди.
Шунингдек, Туркия вице-президенти Фуат Ўқтай Эрдўғоннинг аҳволи “жуда яхши” эканини айтди.
“Президентимизнинг аҳволи жуда яхши. Доимий алоқадамиз. Бир оз шамоллаган, холос”, — дея таъкидлади сиёсатчи Анқара — Сивас шаҳарлараро тезюрар поезд қатнови йўлга қўйилиши муносабати билан сўзлаган нутқида.
Туркия президенти маъмурияти алоқа бўлими раҳбари Фахриддин Алтун Эрдўған 27 апрель куни бўлиб ўтадиган “Оққую” атом электр станциясининг очилиш маросимида онлайн форматда иштирок этишини маълум қилди.
Туркияда Эрдўғон жамоаси президентнинг барча сайловолди чиқишлари ва оммавий тадбирларини 3 майга қадар бекор қилган эди. Мамлакатда 14 май куни президентлик сайловлари бўлиб ўтади.
Эрдўғоннинг соғлиғи ёмонлашди
25 апрель куни сайлов кампанияси доирасида Эрдўғон телевидениеда жонли эфирга чиқиб, саволларга жавоб бераётган пайтида унинг саломатлиги ёмонлашди. Шу сабаблии жонли эфир узиб қўйилди. 20 дақиқадан сўнг Эрдўғон эфирда кўриниш бериб, томошабинлардан узр сўради ва сайловолди ишлари давомида ошқозони шамоллаб қолганини айтди. Шундан кейин ижтимоий тармоқларда сиёсатчи миокард инфарктини бошидан ўтказгани ҳақида тасдиқланмаган хабар тарқалишни бошлади.
Изоҳ (0)